E lei fesiligia gagana ma atunuu ina ua fusia tagata uma i le alofa, ua oo lava i papalagi ua militino faatasi ma le loto faanoanoa ina ua sola le alii ta‘uta‘ua i le lakapi ae tuua lona aiga ma uo i le taaloga, ua taunuu ai upu a le Tusi a tagi, ia fetagisi faatasi, a tiga ia tiga faatasi.
O le tumutumu ai o le Vodafone Events Centre i le Aso Toonai i aiga, o uo mamae faapea ē masani o le alii taalo o Jonah Lomu sa avea lea o se faamāmā avega i lona tuaa ia Hepi ma uso ma tuafāfine o Jonah, aemaise o lona faletua ia Nadene ma nai ona alo o Dhyreille ma Brayley i le motusia ai o le mafutaga ona o le maliu.
O lea faamoemoe na tutu malosi ai le council e lagolago le tali atu i le manaoga o le aiga o le alii taalo ia Lomu e fia faia se sauniga faapitoa e valaaulia ai Community Groups e faamavae atu ai ia Lomu ma tali atu ai foi i galuega lelei sa faia e Jonah Lomu i le Komuniti aemaise lava i South Auckland.
O alii mamalu o le malo sa nafa ma le faafeaoina atu o lona sa mai Epsom seia oo atu i le Vodafone Events Centre i Manukau, faatasi ai ma alii lakapi sa galulue uma lava i totonu o le fale i le faatonutonuina o vaega o le sauniga, e pei o le alii taalo ia Michael Jones sa faauluulu i ai lenei polokalame a le Council, Saveatama Eroni Clarke sa galulue ma le susuga ia John Pulu i le fofogaina o polokalame o le aso faatasi ai ma Ofisa Tonuu sa taitaiina security i totonu o le fale.
Na mamalu ma matagofie le faamoemoe ina ua faatasi atu i ai le Governor General o Niu Sila ia Jerry Mateparae, o le pulenuu o Aukilani ia Tauaaletoa Len Brown, o sui faipule le tofa Su‘a William Sio ma Jenny Salesa, o nisi o tama tuai o le All Blacks ia Tana Umaga ma Eric Rush faapea sui o le Manu Samoa sa taitai atu e le tofa ia Aumua Too Vaega.
O aiga ma uo mai Tonga, o aiga papalagi, o Samoa ma Fiti faapea kulupu taitasi a le Komuniti sa tumutumu ai i le molimauina o lea aso faapitoa. Ae sa lē mafai foi ona tuua le pitolaau o le au tusitala i le lolofi atu o sui o TV ma nusipepa mo le lipotia o lenei sauniga faapitoa.
Na amata le polokalame i tu ma le aganuu a tagata Maori e pei ona masani ai Niu Sila, ona sosoo lea ma le sauniga lotu na saunia e le faafeagaiga Tonga i le latou lava gagana. O molimau ma saunoaga autu o le aso na saunoa i ai le Governor General ia Jerry Mateparae faatasi ai ma le momoliina o lana meaalofa mo le faletua ia Nadene ma ona alo, ona sosoo ai lea ma le tautalaga a le pulenuu o Aukilani ia Tauaaletoa Len Brown lea na molimauina e le toatele o tagata le tagi ma fai lana faamalosi i le aiga o Jonah Lomu.
Saunoa le pulenuu i galuega lelei a Lomu sa faia i le South Auckland faatasi ai ma le vave ona maliu ae faatoa 40 ona tausaga. Faateteleina le tutulu o le pulenuu i ana upu faamafanafana ina ua ia vaai atu i lana fanau laiti e toalua ia Dhyreille ma Brayley ma le tina ia Nadene o nonofo mai a ua lē nofoia le nofoa o Tavita.
Na tauaaoina le tele o meaalofa i kulupu mai le komuniti a Tonga ma Samoa sa auai, ma sa iai foi le tulafale Tonga sa talia meaalofa ma momoli le faafetai i nei kulupu i le latou lava gagana. O le tofa ia Aumua Too Vaega na fai ma sui o tama o le Manu Samoa e faia le upu faamalosi i le va o tama taaalo a Samoa ma Tonga, na ia ta‘ua ai e faapea, e ui i le eseese o atunuu ma gagana ae taaalo lava tama o uso ma aiga, ma sa tauaaoina atu ai foi ma le latou meaalofa mo le faletua ia Nadene ma ona alo.
O le susuga ia Levao Tiavaasue sa fai ma tulafale Samoa na te talia maia meaalofa a le komuniti a Samoa.
O se aso matagofie ma faigofie le faatinoina o le polokalame auā ua galulue faatasi tagata uma mo le faamoemoe, e oo foi i le taumafataga sa galulue ai le NAVY i le lufilufiina.
Na vaaia foliga fiafia o aiga o Jonah Lomu i lea aso auā sa leai se vaipanoa o fafo ma totonu o le fale e lei leoleoina e security ma alii mamalu o le malo.
Na mae‘a le polokalame ua tea le 4 i le afiafi ma tatala ai loa le filialii ae toe faaauau ai galuega a leoleo i le toe molimoliina atu o lona tino maliu i Epsom.
