Faatofa atu Samoa i Le Papaliitele Peter Fatialofa

E lē o mafai lava ona faamae‘a vave le fetalanoaai ai pea o le atunuu i le tuumalo faafuasei o Le Papaliitele. E oo lava i le toatele o atunuu o le lalolagi o loo taulai ai a latou ripoti i toe sauniga o le alii taalo lauiloa aemaise le Manu Samoa.
Na lē mapu le saili i le upega tafailagi ma alaata o le televise sa faasalalau ai toe sauniga ina ua taunuu mai i Niu Sila le tino maliu o Le Papaliitele.

 
Masalo o molimau ma tautinoga mai lava i aiga o uo ma ē latalata le mafutaga ma Papaliitele e oo lava ia i latou o loo tautino i fetusiaiga ae e lei fevaaiai ma Papaliitele Peter Fatialofa, o loo faaauau mai ai se sootaga mai lea tautinoga i lea tautinoga e oo lava i molimau, o se tagata uiga tausaafia i ana evaga ma ana uo, e lē popole tele i le taimi e tatau ona agai i lona aiga i evaga faauo ma le toe faiuo.
Na faaalia lea tulaga ina ua faatumulia le nofoaga le Vodafone Events Centre i Manukau i tagata sa iai faatasi i toe sauniga o Le Papaliitele i lona toe aso ma falelauasi ai. E aoao mai i molimau eseese o se tagata e fiafia e faitalalusi i evaga, e agamalie ana tali i fesili e tuu i ai, o se tagata foi e iai ona uiga e na te silafia foi ona tausi le va tapuia ma tamalii e oo lava i soo se tagata taualoa pe lē taualoa.
E maugagana tele Le Papaliitele pe a oo i taimi o taaloga e faagaganaina i gagana i tauiviga i taaloga e tusa lava pe lē ufiufia i le malae taalo ae lē faaalia ai le fia ta‘uta‘ua i le malosi o loo nanā ai i totonu o ia gagana fesuiaiga o upu faaaogā. Tasi lenei o tamalii ua mafai ona ia savalia maota o alii sili ma ta‘uta‘ua e iai Taitai o atunuu tetele o le lalolagi faapea foi le aigatupu i Peretania ma faaauauina ai pea le gagana fesootai e talanoa ai Papaliitele e laugatasia ai le Tupu, Palemia, poo lana uo mamae.

 
E atagia i taimi taaalo lona naunau tele e puipuia nai ona uso a taaalo pe aiga pe leai ae a Samoa ua lava lea ia Papaliitele e tulai ai e puipui ona uso Samoa. O le a manatua pea sauniga faaleaiga o le Papaliitele, auā e lei umi lava se taimi na faatumulia ai le Vodafone Events Centre ae taulēofi; o pinefaamau ia e iloa ai o isi ia malosiaga o Papaliitele, e aiga uma lava Papaliitele i soo se tagata la te feiloai i soo se mea.
E faaalia foi lea i lona talimalo e tusa lava pe faatoa masani nei ma Papaliitele, e lē popole poo fea e tofa ai ae ave le faamuamua i ana uo e faaaogāina le Tofaga o Le Papaliitele. E tuumalo nei le Papaliitele Peter Fatialofa ua ia faatūina ni matati‘a se lua i lana auaunaga i le Lakapi a Samoa.
Na ia muai faatietie Samoa i le Ipu o le Lalolagi Rugby World Cup 1991 a o avea ai ma kapeteni ma faatoa talanoa ai le Lalolagi ia Samoa. Sosoo ai ma le avanoa na tofia ai e avea ma Faiaogaulu mo le Manusina i taaloga e saili ai avanoa mo Samoa e tausinio ai i le Ipu o le Lalolagi i le lakapi a tamaitai 2014.

 
Sa tele molimau eseese mai ia i latou iloga e pei o le susuga i le Pulenuu o Aukilani, Tauaaletoa Len Brown, o nisi iloga i le lakapi i Niu Sila e pei o le susuga i le Tuifaasisina Brian Williams ma le toatele o isi sa mananao e fia faaleo o latou lagona faanoanoa aemaise le fia molimau i le soifuaga o lenei alo lauiloa o Samoa. Ae atonu o molimau na sili ona ootia ai agaga o le aofia atoa sa auai i toesauniga uma e lua, o molimau a ona alo aemaise le faletua faavauvau ia Anne, a o toe faamatala mai le taimi na amata mai ai le la mafutaga ma mea eseese sa faia mo le la aiga aemaise le nofoaalo, seia oo lava i toe taimi ma toe aso na ia vaaia ai si ona toalua a o soifua.
Aemaise sa iai nisi o ana aga mālie na pei e fou i le tina le faaali mai ia te ia i toe aso o Papalii i Niu Sila nei a o lei malaga atu i Samoa, o ni aga ma upu, atonu sa lei mamafa i lagona o le tina i lena taimi, ae ina ua motusia faafuasei nei le mafutaga, ua avea ma itu ua toe moomoo ai, maimau e, pe ana toe maua mai na taimi ma na upu.

 
E tuumalo tonu lava Papaliitele i le vaiaso e sosoo ma taaloga poo Trials e filifilia ai le Manusina mo le 2014. Atonu e tele nisi matati‘a na ausia ae lē gata i tautinoga ma molimau, a o lea foi ua atagia mai i galuega faatino uiga moni o le Papaliitele Peter Fatialofa i ia matati‘a e ui ina utiuti se taimi sa tau tuufaatasia ai se Manusina.
Sa vaaia i toe sauniga o Papaliitele le toe faatasia ai o le Manu Samoa o le 1991 e faaalia lo latou faaaloalo i le tutulai faaituala lua i taimi e faaulufale ai i ona toe sauniga  aemaise ina ua taunuu i le fanuatanu le Sa o Le Papaliitele Peter Fatialofa.
O le a matuā misia lenei tamalii. Na faaiu ona sauniga i le fanuatanu, ina ua avea le Hai Komesina o Samoa i Ueligitone, le afioga Leasi Papalii Tommy Scanlan, ma sui o le Malo o Samoa, e momoliina atu le tagavai o le Malo Tutoatasi o Samoa, i le Faletua ia Anne Fatialofa, ona o le tautua a Le Papaliitele mo Samoa ma ona tagata.
Ona taualuga ai lea i le Sivatau a le Manu Samoa 1991, e faatofa atu ai i lo latou Kapeteni, Le Papaliitele, a o lei tuutuu ifo lona sa i lalo i le eleele.

 
Tau ina ia faamaise pea le agaga o le Atua i le Aiga, Uo ma ē masani ona o le faafuaseia o le tuumalo ai o Le Papaliitele Peter Fatialofa. Ma o loo lagomau nei lona tino maliu i le Fanuatanu i Manukau Memorial Gardens i Puhinui, Manukau.

Papaliitele-Peter-Fatialofa's-Funeral1.