“Tina ea tina peleina, tina ea e sili lo penina. Tina ea tina peleina, tina ea e sili oe ia ita.” O saafiafiga mulimuli ia o le susuga ia Foti Fualau mo si ona tina pele le afioga i le tiakono ia Tuputala Fualau i lona sauniga faaleaiga (family service) i le afiafi o le Aso Tofi o le vaiaso na tuanai atu.
E valaau lona matai ua valusefulu ma le fā (84) tausaga o lona soifua. E toavalu ona alo, lima tama ae tolu tamaitai, ua tolusefulu ma le lima (35) fanau a ona alo ma a latou fanau (great grandchildren) e luasefulu ma le tasi (21). A malaga asiasi le tina i le aai o Melepone isi ona alo ia Foti ma le aiga, ona avea lea o le Ekalesia AOG Church of Samoa i Werribee ma ana Ekalesia tapuai.
O le susuga lava foi i le faafeagaiga o le Ekalesia lea, le susuga ia Solomona Vaofusi na taitaia le sauniga. O Pastor Tavita Anitipa na fofogaina le olega mo faamafanafanaga mo le aiga faavauvau, a o afioga faamafanafana a le Atua na saunoaina e Pastor Apouani Unasa. Na saunoaina foi molimau a le faafeagaiga a Tuputala mai Samoa, Rev Iona Paniani ma le faletua ia Tasileta o loo fai malologa i Melepone, e tusa ma le soifua tautua o le tina i lana Ekalesia sa pele i lona loto le EFKS i Apai Manono Tai.
Na saunoa foi le tiakono ia Foti e molimau i le la mafutaga ma si ona tuaa. Na lagona le nutimomoia a o faatofa ma faamavae atu, ona o le afiafi o le Aso Tofi na sosoo ai, na tuuvaa ai lona sa mo ona toe sauniga i lona aiga pele i Manono. Tofa Mum, e le galo oe i agaga!
