E leai se vaega faigofie o le molimauina o se maliu, ae faateteleina le faigata pe afai o le maliu e faafuaseia ma e tulai mai i se tagata e lē iai se manatu ua oo i sona taimi.
Ae o manatu nei na faatumulia ai le toatele na molimauina toe sauniga o se tamā talavou e 37 tausaga le matua ina ua faatofa atu i ai i le vaiaso na tea nei.
O Simati Stowers o Vaimoso ma Alamagoto o se tamā e faato‘ā toafā lana fanau ma sa nonofo faatasi ma lona aiga i Vaimoso ma Alamagoto.
O se alii na galue faakamuta i konekarate i totonu lava o le talafatai o Apia.
O ia tonu lea na maua lona tino maliu i se nofoaga faasao mo laau a le Malo i Vaitele ma ua taofia ai ni alii Vaigaga se toatolu ona o lona maliu.
O le lua vaiaso talu ai lea na tulai mai ai se faalavelave i le nofoaga faasao lenei e tu auala lava i tala ane o le lotoā a le Vailima i Vaitele ma o se nofoaga e tele ina mālōlō i ai le atunuu pe faaaogā foi e faatali pasi ai. Ae o le nofoaga lea na uma ai le ola o Stowers i le vaveao o le Aso Sa ua lua nei vaiaso ua tuanai.
E maua le tino o lea alii ua i se tulaga faaletonu ona o le ogaoga o manu‘a i ona foliga ma lona ao atoa, ma e masalomia o ni maa na faaoo ai e ni alii le maliu i lenei alii.
O le lipoti a le Ofisa o Leoleo na ta‘ua ai o se feeseeseaiga na masalomia le tulai mai i se fale ‘ava e ta‘ua o le Johnny’s Bar i Vaitele ma o inā na fai mai ai ni tuliga a le alii o Stowers ma nisi alii talavou.
O se tuliga na oo mai lava i le nofoaga e pei ona ta‘ua o le faasao a le Malo lea e totō ai laau ma avea ma nofoaga e mapu i ai le toatele o le atunuu i aoauli ma afiafi.
Faaalia e se alii e galue i se tasi o faleoloa lata ane, o le tuliga lenei na o latou iloa ona o le pisapisao ma na faalogo atu lava o fai taugaupu ma ua fufusu mai tagata.
O le iuga la lea o le oo atu ua taatia mai Stowers ua uma lona ola.
O toe sauniga faanoanoa toe sauniga o lenei alii ona o molimau a lona aiga o se tagata naunau tele i si ana fanau, ma e maliu o loo tuli le faasalaga o si ona toalua i le toese i Tafaigata.
Faaalia e le tina o le aiga, na te iloa lava o le faaletonu na tulai mai i lo la aiga, e telē lava se aafiaga i lona toalua ma na taumafai toatasi lava e saili se seleni mo le tausiga o si o la aiga laiti ina ua tuli le faasalaga faafalepuipui o le tina.
Ta‘ua e le tina atonu o le mafuaaga lea ua mae‘a ai ana galuega ma agai loa mo se faamalositino i le fale ‘ava lea na mafua mai ai lava lenei vevesi ua uma ai lona ola.
Ta‘ua e lenei tina le tele o le aafiaga o lo la aiga o lea ua faafuaseia ona motusia le mafutaga ona o le oti ma o loo maitaga foi le tina e ui e lei mae‘a ona tuli lona faasalaga.
O le ifoga ua mae‘a ona faatino e aiga o i latou ua tuuaia i le osofaiga ua maliu ai Simati ma ua toe tolopo le faamasinoga o nei alii seia oo i le faaiuga o le masina nei.
E toatolu alii Vaigaga ua molia nei i le fasioti tagata faamoemoeina ona o lenei faalavelave.
