Ole tele o tapenaga mo ni fonotaga tetele faavaomalo a lē ole amataga e aliali ai se faaletonu, ole taualuga poo le taimi ua faagasolo le fono. E faapena le tulaga na molimauina e le silia ile onoselau o malo valaaulia, o sui o Malo ma faalapotopotoga mai fafo faapea taitai ole Pasefika ma latou usugafono ina ua tatala le fono lona 48 a taitai ole Pasefika ile fale mataaga ole tusitala o Lopati Lui Sitivinisone i Vailima ile afiafi ole Aso Lua ua mavae.
Na faatimutimu le afiafi ile taimi na gasolo atu ai le valaaulia o usugafono ma taitai, ae ina ua mae’a le sauniga lotu na saunia ele susuga ile faafeagaiga ole ekalesia EFKS i Apia le susuga Utufua Naseri, ae molimauina loa ele toatele le faaletonu ole faaleotele leo sa ile vaega e faia ai saunoaga autu ole polokalame.
Ole Peresetene ole Malo o Maikoronisia sa avea ma taitaifono ole fono a Malo ole Pasefika na saunoa ina ua mae’a le lotu, peitai ose tulaga na lē nofo lelei lagona ole toatele ina ua saunoa lea taitai o Malo ole Pasefika ae pepē mate le faaleotele leo.
Na alu atu le tama inisinia ole vaega na vaaia masini faaleotele leo ma le isi mike poo le faaleotele leo, ole mea lava e tasi. Toe avatu le faaleotele leo lona lua, ma le lona tolu e faaletonu foi.
Ole faaleotele leo lona fā na alu ai le taliē ale aofia ina ua maua le leo ae motumotu, ma le saunoaga ale Peresetene o Malo Maikoronisia ole faaleotele pito laitiiti lea ua avatu ae e faa’afa’afa foi lana ola.
Faaalia ese tasi o malo valaaulia ose ofisa sinia ole Malo o Samoa, e ese le matagā ole tulaga na tupu ona se’i faaletonu foi le faaleotele leo ale fofoga ole aso poo le Master of Ceremony, ae faaletonu lava le faaleotele leo mo saunoaga autu.
“O mea laiti ia e manatu faatauvaa iai, ae aliali ai le matagā i luma o tagata ma taitai ole Pasefika”. Na oo le faasologa ile saunoaga ale Palemia o Samoa e faafeiloai taitai ma malo valaaulia, ma faia foi lana folasaga ile autu ole fonotaga ae faatoa maua le faaleotele leo e lelei atoatoa.
Na muamua lava faatoese le susuga Tuilaepa L Sailele Malielegaoi ile Peresetene ole atunuu Maikoronisia ma lana saunoaga e faapea, ole faaletonu na tupu e mafua ona o masini faaleotele leo na aumai ile atunuu o Korea i Matu. Na lagona le alu a’e ole talie ale toatele ae ole tala mālie ale Palemia e tau afei ai le faaletonu na tupu.
Faaalia e se tasi ole komiti o tapenaga ole fono o nai faaletonu faapea e masani lava ona tutupu ae sa lē tatau ona tupu mai ile amataga ole fonotaga. “E aogā mea e tutupu e toe salu lelei ai le fale ma fufulu faaletonu ina ia aua ne’i toe faaluaina pe faatoluina foi ona toe aliali mai”.
Ole amataga ole vaiaso nei sa faia ai le feiloaiga ale Palemia ma ē uma sa gafa ma tapenaga ole taligamalo, ma ua faaalia e se molimau e iai le tagata ole a fetaui ma le ma’ema’eā ole faauluuluga o tapenaga ona ole faaletonu na aliali mai.
