Faatoese le Iunivesite Aoao o Samoa i le sasi

Ua faatoese le taitai o le Iunivesite Aoao o Samoa i le fanau e to‘a 13 ia na lē mafai ona faauu i lenei tausaga ona o se “sasi” na tulai mai i suega na sue ai aemaise o le manatu ua mae‘a uma pepa na o latou sueina o le mataupu faasaienisi.

O le sasi na tulai mai ai se feiloaiga i le va o mātua o nisi o fanau ua lē faauu i lenei tausaga ma le pulega o le Iunivesite na mafua ona ua faalauiloa le faauu o nei alii ma tamaitai ae faatoa iloa mulimuli ane e lei ausia le maualuga o mataupu sa tatau ona pasi faatoa faauu ai ma o se sasi na faalalolalo ai le Tapaau o le iunivesite ona o le maoaluma o mātua ma aiga ae ua lē taunuu le faamoemoe.

“O le mea moni lava ia ua sasi le Iunivesite ma e faamalulu atu ai i mātua ma fanau aoga na faapea ona aafia i lea suiga”.
Faamalamalama le afioga i le Tapaau o le iunivesite i le mafuaaga tonu lava o le lē faauu o ia sui o le Iunivesite. O le tusipasi e pei ona ta‘ua lea ua lē faauu ai fanau aoga e to‘a 13 o tusipasi ia o le tomai faasaienisi (Applied Science).
O le taimi muamua lea ua sue ai fanau i le Iunivesite Aoao o Samoa i lea tusipasi ma na ta‘ua e le afioga Lau Dr Asofou e lē iloa poo le tasi lea mafuaaga o le feleiloga‘i o iuga o suega ona o lea faatoa iai lea o lenei mataupu.

E ui o lea sa ta‘ua ua tuu uma lava suafa o alii ma tamaitai aoga nei i le lisi o i latou ua pasi ia mataupu ae e lei maua atu faaiuga uma o suega. O le faafitauli na ta‘ua e le Tapaau.
O mataupu uma e sue i tausaga taitasi e iai le aofai o pepa e sue e le tama ma le teine aoga ma o le aofai o pepa pe lua agai i le lima e tatau ona sue uma lava ma o le pasi foi ua iai lava le numera e faatapulaa e tatau ona togia o le pasi lea i se mataupu pe i luga atu o le 50 pasene o togi pe i luga atu foi.

O le faaopoopoga atoa la o togi nei ma le aofai o pepa sa tatau ona sue faatoa maua mulimuli ane ai e iai mataupu taitasi a sui nei e lei pasi i le kuata (semester) muamua o le tausaga na tatau ona toe sue ma faamae‘a lelei i le faaiuga o le tausaga ae e lei faatinoa.
“E fai foi la o le sasi a le Iunivesite, ae sa tatau lava foi i tama ma teine aoga ona siaki ma toe faamautu a latou mataupu auā o loo iai lava le kalena e tufa atu ia i latou i le amataga o le tausaga, o loo iai uma lava aiaiga o suega nei ma mafuaaga o le a lē mafai ai ona faauu se tama poo se teine aoga mai i ia suega,” o se faamatalaga lea a le afioga i le faauluuluga o le iunivesite.

O se faamanatu tāua lenei, le tulai mai o lenei mataupu auā ua ta‘ua e le afioga Lau Dr Asofou, o lea ua tatala le avanoa e faamae‘a ai pepa taitasi nei e totoe o le toatele ia ua lē faauu ma e faatino lea tulaga i le tausaga fou lenei i le toe a‘e ai o le aoga. Ae na ia ta‘ua atonu o le a lē toe tupu mai lenei sasi ua afaina ai lagona o le fanau ua lē faauu aemaise foi o mātua ua alu le tausaga o tapuaia taumafaiga a le fanau aoga.
“E aogā lava mea e tutupu e toe faaleleia atili ai le pitolaau a le iunivesite latou, aemaise foi i fanau o loo aoaoina i le iunivesite,” le saunoaga lea a le afioga Lau Dr Asofou Soo.
Mamalu o mātua ma fanau na lolofi atu e fesiligia le tulaga o sikolasipi o fanau