Faatoese le faiaoga o le Manu Samoa

O upu faalalolalo ma le faamālūlū na fofogaina i le saunoaga a le faiaoga o le Manu Samoa, le Afioga Fuimaono Titimaea Tafua i se feiloaiga ma Tusitala i lenei vaiaso.

Na manino lava le faanoanoa o le Pulega o le Iuni Lakapi a Samoa i le lē mafai ona ausia o le faatumutumuga o manaoga ina ia foi mai Samoa ma le Ipu o le Lalolagi i le taaloga o le Lakapi.

Ae e pei ona saunoa le alii faiaoga o le maualuga lava lea ua oo i ai le taumafai a le ‘au.

Na fesiligia pe faamata a toe tepa i tua, o ā ni auala sa tatau ona faaleleia atili ai faiga filifiliga i le tofiga o le ‘au a le Manu Samoa i le taimi o taaloga.

O le tali a Fuimaono o le faaiuga i le filiga o le ‘au i taaloga na tausinio ai na “autasi uma i ai le pulega a le Manu Samoa”.

O le faamatalaga a le alii faiaoga, o lea e mae‘a i lea taamilosaga lana konekarate faiaoga ma o le filifiliga e toe foi mai e faiaoga i le ‘au a le atunuu o se filifiliga lena e faatautaia lava e le Iuni Lakapi a Samoa.

I lana saunoaga aloaia i le atunuu e faafetaia ai le tapuaiga a Samoa na ia faaalia ai: “E fai ai a‘u ma sui o le Pulega ma le aulakapi a lou atunuu sa tauina le taua, matou te faamaulalo atu ma momoli atu malu i pu‘ega i lou finagalo mafatia, ona ua lē tau lau o le faamoemoe.

Ou te ta‘utino atu, o le mafai na gata ai le mafai, o le lelei na gata ai le lelei, o le iloa na gata ai le iloa, ma le malosi lea sa tuu atoatoa i le tapenaga o le tatou ‘au”.

E lei tele se faamatalaga a le faiaoga e faatatau i mataupu na lagā o le Ipu o le Lalolagi se‘i vaganā ai lava lana faafetai i le autaaalo aemaise le tapuaiga a Samoa ua mafai ai ona ausia le maualuga na oo i ai taumafaiga a tama i le Taamilosaga o le Ipu o le Lalolagi.

“Lo‘u atunuu e, Ou te lē ati se pa ou te lafi ai, ou te lē fauina foi se ‘olo ina ia ou malu ai.

O le faatinoga o le taaloga sa lafo mai i ai lo outou faatuatuaga ia te au nei, ma alo ma fanau a le atunuu. Sa taalo matou, ae sa faamasino mai lau tapuaiga ma lau silasila.

Afai sa lelei, foi le viiga i le Atua, afai foi na mafuli i ni faaletonu, fifi i lo‘u tumua‘i, ma ia pupuni ai se malamalama i o‘u lauifi, leaga e faigata lau tapuaiga Samoa, o oe o le ao mamala.”

O le faaiuga o le vaiaso na tea nei sa faatautaia ai se feiloaiga i le va o le Iuni Lakapi a Samoa, le Malo ma tama o le Manu Samoa ua toe malaga mai i le atunuu a o lei taape atu tama o le au mo konekarate i atunuu mamao.