Ua latalata i le masina talu ona molimauina le fai ma motusia faafuasei le eletise i vaega eseese o Samoa. O lea ua faalauiloa mai se faamaluluga a le Faalapotopotoga o Malosiaga tau Eletise ona o faaletonu o feagai nei ma le Pulega ua mafua ai lea faaletonu.
I sana pepa faalauiloa i le faaiuga o le vaiaso na ta‘ua ai e le EPC na faaalia o le tele lava o le vaega o le atunuu na aafia i le motu soo o le eletise e aofia ai le itu i Sisifo o Upolu ma le itu i Saute, ma na ta‘ua ai o faaletonu i se tasi o afi suauu tele i Tanugamanono na tapē ina ua tulai mai ai se faaletonu.
O le mafuaaga lea o le faasoasoa o le eletise ma motusia ai loa vaega eseese o le atunuu. Faaalia e le EPC e sili le faasoasoa faapea nai i lo le pe atoa lava o le atunuu.
Faagasolo galuega i laina ta‘i i le eleele
O loo faagasolo nei galuega i le faamautu ai o le fesootaiga o le a faatonutonu tasi ai le ola o le eletise ma le faasoaina i le atunuu atoa.
O le itumalo Faleata lea ua agai mai ai le galuega e pei ona molimauina e le Iniini Samoa i lenei vaiaso ma o uaea nei o loo ta‘i i le eleele o loo sau agai i Fuluasou ma faasoa atu i nofoaga eseese e iai afi o loo ola mai ai le eletise. Na amata mai i le afi i Tanugamanono le ta‘i mai ai o laina nei o fesootaiga ma o le a faasoa atu i Mulinuu i le nofoaga o loo iai le vaaitau aemaise le agai atu o nei laina i lalo o le eleele i le afi tele fou i Fiaga.
O le aogā o lenei fesootaiga tele o le a tasi ai lava le nofoaga e faatonutonu mai ai le eletise, ma o Fuluasou lea ua faamautu uma i ai fesootaiga nei.
E oo foi i laina o eletise i le motu o Savaii o le a agai uma mai lava i lea nofoaga ma o se tasi o laasaga maualuga o le a molimauina i le mae‘a ai o lenei galuega o le faaitiitia ai o le motusia o le eletise aemaise o le mautu atoa ai o nofoaga uma o le a fesootai ai le eletise. O le kamupani a le afioga Feo Nemaia o loo nafa ma le galuega o le ta‘iina o le laina lea e ta‘ua o le Fibre-optic ina ia faafaigofie ai fesootaiga nei.
