Ua toe manatua tausaga ua mavae i taunuuga o suesuega a nisi o tamalii sa avea m Suetusi Sili o le Malo na aliali mai ai i luma faiga piopio i totonu o le faatinoga o galuega a matagaluega ma faalapotopotoga a le malo.
O ia faaletonu ua sola sa tele ai faitioga a faigamalo ua mavae faasaga i nisi o Suetusi Sili e pei o le Afioga Su‘a Rimoni Ah Chong, ma ta‘ua ai le aafia o ni gaioiga faapolokiki i le taunuuga o nisi o ana suesuega aemaise lava ina ua aliali mai i luma o ana suesuega nisi o faiga lē manuia na aafia ai nisi sa avea ma faauluuluga o matagaluega a le Malo faapea nisi sa avea ma minisita o le Malo.
O ia vaitau ma mea na tutupu ai na liliu ai faigamalo i lena vaitau ma teuteu le faavae ma suia ai le taimi galue o le Suetusi i le tolu tausaga ae aveese le 60 tausaga e oo i ai lona soifua faatoa tuua le tofiga.
O lea la ua toe suia aiaiga o le faavae ma ua aveese le 3 tausaga o le taimi galue o se Suetusi Sili ae tuu i ai le 12 tausaga, ma le aiaiga a mae‘a ona faamavae lea e lē mafai ona toe galue. Ua aiaia ai foi le lē mafai ona toe faafaigaluega e le Malo o se tasi sa avea ma Suetusi Sili pe a mae‘a lona taimi galue.
O le tiute tauave o lea ofisa o le Malo o le sueina lea o tusi i le faaaogāina o tupe ma meatotino uma a le atunuu o loo faaaogā ma vaaia e matagaluega ma faalapotopotoga eseese a le Malo.
O le masani lava o ia suesuega o le aliali mai ai o ni faiga lē manuia ma faiga soonafai ma faatautala i tupe ma meatotino a le Malo. O le tāua foi o le iloa o ia faiga o le saili o fofo e togafiti ai ina ia lē toe tulai mai.
O suiga fou ua iaiā i le faavae mo le ofisa o le Suetusi Sili ua faaalia manino ai e le Palemia, Susuga Tuilaepa L Sailele Malielegaoi, o le a tausisia ai le faamaoni o le faatinoga o ona tiute ma ia lē faaitu‘au sana suesuega.
O le a tuusa‘o ai foi lana lipoti o se suesuega i le Palemene e aunoa ma le ave muamua i le Palemia ma le Malo auā ua saunoa le Palemia e faia ai le amiotonu.
A tuusa‘o le lipoti i le Palemene ona leai lea o se faaluafesasi o manatu ma lagona pe sa toe faia nisi suiga i le lipoti pe afai e ave muamua i le Palemia ma lana kapeneta a o lei tuuina atu i le fono aoao faitulafono.
O le Afioga Fuimaono Kamilo Afele o loo tulai nei i le tofiga Suetusi Sili ma ua mae‘a lana nofoaiga muamua e tolu tausaga. O le tausaga ua mavae na toe filifilia ai mo le isi tolu tausaga ae ua pasia nei teuteuga o le faavae e faasino i lea tautua a le Malo ma ua avea ai o ia ma uluai Suetusi Sili e tauaveina tiute e tusa ma le teuteuga fou o le faavae ua pasia.
O le lē mafai ona toe galue o se Suetusi Sili i se matagaluega a le Malo pe a mae‘a le sefululua tausaga ua aiaiā, na saunoa Tuilaepa o le a lē faaitu‘au ai le galuega a le Suetusi Sili.
