O faamaumauga i Samoa o tagata ua faaletonu le faalogo ma ua tutuli ma logonoa ua iloa ai, ei le va o le 60 i le 70 pasene o tagata e oo le matua o le soifua i le 60 ma le 70 ua aafia. O fanau iti e lē o iloa tonu ni faamaumauga o iai i le taimi nei ae o le itu mautinoa e iai fanau o loo faaletonu le faalogo ma e lē o lelei ai ma le tulaga o a latou a‘oa‘oga.
O le vaiaso nei o le a saga faalautele ai lenei faaletonu ua molimauina le aafia ai o tagata o si o tatou atunuu, e ala i se mafutaga o le a talanoaina ai le mataupu i le faaletonu o fofoga poo taliga o nisi o le atunuu, ma le sini autū e taulai i ai poo le ā se fofo e vave ona togafitia ai.
O sui o le auaunaga faalesoifua maloloina, le matagaluega o tina ma tamaitai atinae o nuu ma afioaga ma aga fesootai, faapea le faalapotopotoga o le SENESE o loo nafa ma polokalame fesoasoani mo fanau ua aafia le faalogo, o le a latou soalaupule le mataupu i le sua o le aulapa uta ma le aulapa tai e saili ni manatu ma ni meatotia e faaleleia ai lea faaletonu tau i le soifua lelei oo tatou tagata.
O le a mafai i le mae‘a o lenei mafutaga ona maua ni manatu e fausia ai se aula tau fuafuaga mo le lumanai e faaleleia ai le faalogo a fanau ma tagata matutua ua aafia. O le a aofia i le fuafuaga lea ma se taiala e lima taitaiina ai fuafuaga uma ma ia faia ai foi ni suesuega i le atunuu atoa i ni fanau ma ni tagata matutua ua faaletonu le faalogo mo le fā tausaga o lumanai.
O le mafai foi i le mafutaga i le vaiaso nei ona faailoa matafaioi tauave a le auaunaga faalesoifua maloloina le National Health Services, ma le matagaluega o tina ma tamaitai i le foia o le faaletonu. Faaalia e le SENESE i se pepa o faamatalaga o se tasi lenei o faaletonu e manaomia tele ai le lagolago a le atunuu aemaise o mātua ina ia mafai ona fesoasoani atu i ai latou ua logonoa ma tutuli, aemaise lava le fanau e mafua ona aafia le faalogo ona o nisi mafuaaga e aafia ai lo latou ola saogalemu a o tutupu a‘e.
Faaalia e le tamaitai Faatonu o le SENESE o Donna Lene, o se tasi lenei o laasaga maualuga ua ausia e le faalapotopotoga i ana polokalame faalauiloa e unaia ai le atunuu e faatāua ia i latou faaletonu ua aafia ai fanau ma isi tagata tino i matutua ona ua leaga le faalogo.
O le maua a le tamaitai faatonu, a lē lelei le faalogo e lē atoatoa foi le fiafia o se tagata, auā o le a lē lelei le faatinoga o ona manaoga i le faiga o feau ma galuega aemaise lava i le itu i a‘oa‘oga. O le mae‘a o le mafutaga faalea‘oa‘oga lenei o le a faalauiloa ai ma le poster poo se feau faalauiloa ua faapipiina i pepa ua ta‘ua o le Lagona loa poster campaign.
