Faatino e le aoga tulagaua a Otahuhu le tala ia Iosefa o le Tusi Paia

Ua masani le faalogo i le afioga a le Atua, e faatatau i le olaga inosia o Iosefa le fai miti ma ona uso, ae o le po o le Aso Lulu ma le Aso Tofi na se‘i mavae atu nei, na maimoaina ai se tala faatino lea na faaigoaina, “Joseph and the amazing technicolor dreamcoat”.

O se tasi o polokalame faatino i totonu o aoga, peitai o le taimi muamua lea ua faatino ai i totonu o le aoga, ma o le taimi muamua foi lea ua lua ai ni po e fai ai lea production i totonu o le aoga tulagalua a Otahuhu.

E pei ona masani ai le Aoga, e tailua lava tausaga ma faatino lea polokalame. O le faatinoga o lea faamoemoe e tele i pese faamatala le momoliina o le feau o lenei tala, ma sa molimauina le toatele o alo ma fanau aoga Samoa sa mau tofi i vaega faapitoa.

E tele taimi ma vaiaso sa taumafai ai faiaoga ma le silia i le fasefulu o tamaiti aoga e tuufaatasia lea faamoemoe, ma sa faataunuuina ma le manuia i po e lua. Na molimauina ai le ‘oa o le tomai ma le poto faasoa i le taleni pese, siva ma le faatinoga o tala e le fanau aoga.

E maofa ai nisi ona o le laiti o tausaga, ma o le toatele o i latou mai le tausaga faaiu le Year 8. E lei faigofie le taumafaiga ona e tele vaega e faatino ma taumafai ina ia tuufaatasi, pei ona saunoa iai le Pule Aoga Mr. Woods, peitai o le lagolagosua malosi a mātua ma faiaoga faapea le fanau, sa faigofie ai ona tino mai le faamoemoe.

O se tala malamalama e pei ona silafia e le atunuu, le inosia o Iosefa e ona uso, talu ai faiga lelei sa fai e lo latou tamā ia te ia, ma lona ofu talaloa felanulanuai na tuuina i ai e pei ona faaautu ai le tala faatino. Seia oo lava ina faatau atu o se pologa i Aikupito, ae na avea ma faamanuiaga mo ia, aemaise le loto faamagalo i ona uso ina ua toe foi mai e saili fesoasoani i Aikupito.

O se tulaga ma se feau lelei mo le fanau aoga, aemaise se aoaoga aogā tele, i le toatele sa auai i nei po e lua, o se lauga aogā na momoli atu auā le faigata o le tupulaga i lenei vaitau. O se lagona faagaeetia i mātua ma aiga Pasifika, o le vaaia o le sagisagi fiafia o nai fanau i le latou faamoemoe, e leai se foliga fefe ae na o le maofa i taleni ma agavaa e faasoa mai e le fanau e ala i faatinoga eseese o le latou production i ia po.

O loo iai le faamoemoe e toe fai foi se isi tala faatino a le aoga i le isi lua tausaga o lumanai, ma le tulaga mautinoa, e ono suipi foi se alo Samoa i se vaega autu o se tala faatino.
Iosefa ma ona uso

Jiroh Mamea sa fai ma Iosefa i le tala faatino