O le faaiuga a alii ma faipule o le afioaga o Solosolo na faamautu i lenei vaiaso ua soloia ai le aufuefue i le aiga o se tama e suafa ia Pouniu. O se finagalo lenei o le afioaga i le afio i le Taofia a Malietoa Taulapapa ma le latou Tama, faapea le Usoalii ma e na au i Ao, ma le mamalu ia Sa Leutogi Po’e o le lima matua o Faleupolu e Fa o Tofiga, ona o le manatu ua toe solia e lenei aiga se maliega na tuu i ai le avanoa e tasi e nonofo ai i le afioaga. O ni feeseeseaiga muamua ma le nuu na mafua ai se faaiuga e faatea muamua lenei aiga, peitai o se vevesi na tulai mai ma leoleo lea ua faia ai loa le faaiuga faaiu a le afioaga.
O i latou ua aofia i le faaiuga a le afioaga
O le aiga ua soloia ua aofia ai Pouniu ma lona toalua faapea le la fanau ma o latou aiga. O le mafuaaga o lea faaiuga na faia e le afioaga i lenei vaiaso ona o se faalavelave na tulai mai i le Aso Lulu o le vaiaso na tea nei na tauai ai e lea fanau le taavale (van) a leoleo. E tulai mai le vevesi o taitai atu e leoleo le toalua o le afafine o Pouniu i le taavale a leoleo. O le mafuaaga o le ave o lea alii na faaalia e leoleo ona o le fia faatalanoaina o ni tagi ua oo atu i le Ofisa ua tuuaia ai le alii ua maupaolo i le aiga lea i Solosolo ona o taavale na ave i lea alii mo le faaleleia ae maea ane ua leiloa totoga o taavale. E faatu lava le fale inisinia o le alii ua tuuaia i lo latou aiga lea i Solosolo.
Faaleagaina le taavale a leoleo ae sola le alii na sailia
O se taavale o le ituaiga o le van na agai ai leoleo i Solosolo aua le taofi mai o le alii inisinia peitai e foi mai leoleo i le ofisa ua leai atoa le tioata tele o i tua o le taavale, faaleagaina le itu agavale o le tino o le taavale ma taei atu ai ma faamalama i itu uma o lea taavale. E leai se leoleo na lavea ai i lea tauaiga maa ae na mamulu ai ma le inisinia lea e oo mai i le taimi nei. Na toe foi leoleo i Apia ae faafilemu e le afioaga le aiga.
O le aso la na sosoo ai na fono ai loa le afioaga ma faia ai le faaiuga e faatea motu loa le aiga o Pouniu mai Solosolo.
E le o le taimi muamua lenei ua faatea ai le aiga
Faaalia e le afioga i le pulenuu o Solosolo le fetalaiga ia Segaula Lo’i o le faalua lea ona faatea le aiga lea peitai o le faateaga muamua na toe suia le mafaufau o le afioaga ina ua aumai se faatonuga mai i le Faamasinoga o Fanua ma Suafa e tuu se avanoa se tasi i le aiga. O le avanoa la lea ua manatu le nuu na ave i ai ae o lea ua toe faaleaga lava e i latou.
O le afioaga foi na valaauina leoleo e agai atu loa i le Aso Tofi e aumai sui o le aiga ia ua masalomia i le tauaiga o le taavale a leoleo.
Faaalia e le tofa a Segaula na muai fai le faaiuga a le nuu e tuu atu vaiaso e fa e tapena ese ai le aiga peitai na muliai se tofa e sili ai le tuu atu na o se vaiaso se tasi lea la ua faamautu ai ina ua tu le tootoo o le afioaga i le aiga i le Aso Tofi.
O le afiafi lava foi o le Aso Tofi lea na oo atu ai Leoleo i le fale o lea aiga ma aumai uma sui na masalomia i le tauaiga maa i le ofisa o leoleo i Apia aua le fesiligia ai i le faalavelave na tulai mai.
Faaauau suesuega a leoleo
Na fesiligia le Komesina Lagolago o le Ofisa o Leoleo, le Susuga Papalii Li’o Ta’eu Masipa’u i lenei mataupu ae na ia faaalia o le taimi lenei o loo ave lava le faamuamua i suesuega a le ofisa i le alii inisinia lea na muai sailia. O ia lea ua tulai mai ai le faalavelave lea ua aafia ai ma le aiga i le faaiuga a le afioaga. E lei maea la galuega a Leoleo ma o le a faapea ona maua se tali maumaututu i le aofai o le aiga o le a molia atoa ai ma moliaga o le a faia faasaga ia i latou pe a maea lelei a latou suesuega.
E pogisa lava le afiafi o le Aso Tofi o faatalatalanoa sui o lea aiga e leoleo. O le faafetai a le ofisa o leoleo ona o le lagolagosua a le afioaga i le faatinoga o le latou galuega. Na fesoasoani foi le afioaga i le Aso Lulu ina ua tulai mai le vevesi e saili le alii inisinia peitai e lei maua lava o ia.
