E to’a sefulutolu Ofisa Sili poo Faauluuluga o Matagaluega ma Faalapotopotoga ale Malo ua faatauto mo le aloaia o latou tofiga ele Malo. O i latou uma ua faatauto ole uluai taimi lea ua filifilia ai i ia tulaga tofi maualuluga ole Malo e aofia ai tamaitai e to’afā ae to’aiva alii.
Ole faatinoga o tiute oi latou e lē faigofie auā e palasi iai le lelei ma le leaga ole auaunaga a soo se matagaluega ma faalapotopotoga ale Malo pe a iai ni lape e aafia ai le tautua a tagata faigaluega ale Malo.
Ole aano lea ole saunoaga ale afioga ile Palemia e faufautua ile faatinoga o latou tiute. “A iai se mea lē sa’o ale Minisita, fautua iai auā ole minisita foi latou e leai se atoatoa o iai”, na fautua ai le Palemia, Susuga Tuilaepa L Sailele Malielegaoi. “Ia faatino outou tofiga ma le faamaoni, tu i luga ma savali e siaki le faatinoga o galuega ale aufaigaluegaae; aua le nofonofo ma faalue i lou potu ea malulu auā ole mafuaaga lena ole maua i gasegase aemaise ole limonia ile malosi ole ea malulu o lou ofisa”. Na tima’i foi le Palemia ia i latou ua tauaveina nei tofiga e aua le tuufaua le measese e alu loa ae ia vave ona faia iai se fofo. “Ole faaletonu la ose toatasi o outou e afaina uma ai lava isi taumafaiga a isi auaunaga ale tatou Malo, ma e tasi lava le lago mate nate faalēaogāina ai le suauu manogi. Ia pule ma le alofa le aufaigaluega o isi foi tagata atamamai latou, latou te solisoli muliaao mulimuli ane avea foi latou ma pule latou te iloa ai foi e latou ni au faiga piopio e fai.”
E oo uma mai lava ile Kapeneta le nanamu oni ou faaletonu, aisea o Samoa ose tamai atunuu laititi lava toe fesaua’i gafa o aiga; e iloa vave ai ele lima taumatau le mea e fai ele lima agavale, ma ole taimi e uma ai lau konekarate e aumai lava foi ele Atua le auala e faatautau ai lou atigi tagata ua gaogaoii i luma ole saofaiga ale Kapeneta pe a oo ina toe aumai i luma lou lumanai galue pea”.
E lei ‘alo le saunoaga ale Palemia i lona faailoa i Ofisa Sili ua filifilia, a iai ni o latou faaletonu, e fai ele Kapeneta le faaiuga e oo ai ina vave malolo manumalo talavou.
E manino ile saunoaga ale taitai ole Malo e poo le ā lava le talavou ose Ofisa Sili ae a oo ina faia le finagalo ole Kapeneta e lē toe filifilia, o lona taunuuga lena.
Faaululuga fou na Faatautoina ma latou Matagaluega:
Aliimuamua Malaefono Tauā Taaloga – Ofisa o Numera Faamaumauina
Ulu Bismarck Crawley – Matagaluega o Puna’oa Faalenatura ma le Sioosiomaga
Ulugia Petelo – Faalapotopotoga o Eleele a Samoa
Faimalomatumua Mathew Lemisio – Ofisa o Faigapalota
Lautimu’ia Afoa Uelese Vaai – Kamupani Vaa o Samoa
Letuimanu’asina Dr Emma Kruse Vaai – Pulega o Tusipasi ma Faailoga Taualoa
Pauli Prince Suhren – Faalapotopotoga ole Lumanai Manuia o Tagata (NPF)
Pulotu Lyndon Chu Ling – Matagaluega o Alamanuia ma Leipa
Seuseu Dr Joseph Tauati – Faalapotopotoga o Suesuega Faasaienisi a Samoa
Sooalo Kuresa Sooalo – Pulega o Uafu ma Taulaga
Teleiai Dr Lalotoa Mulitalo – Komisi ole Toe Fuataina o Tulafono
Tootooleaava Dr Fanaafi Aiono Le Tagaloa – Pulega o Teugatupe Faavaomalo ale SIFA
Tuala Tamaalelagi Tuala Siaki II – Ofisa o Petipetiga a Samoa.
E taitolu tausaga konekarate a Ofisa Sili ma e toe iloilo pe a mae’a, ma afai e iloilo atu oloo lelei le faatinoga o galuega e mautinoa le toe tusiaao iai ole Kapeneta, ae a iai ni faaletonu e lē toe filifilia.
