Tautino le Komesina o le a ia faia ni suiga fou i le matagaluega
Na tumutumu le potu faamasino numera 4 i le toatele o aiga ma uo aemaise o mātua o le afioga i le Komesina fou o leoleo le susuga Egon Keil, ina ua faataunuu le sauniga o le faatauto lea o alii komesina mo le faia o lana tautinoga faaleoleo poo le oath of office.
O se sauniga na saunoa ai foi le tamaitai faamasino le afioga Mata Tuatagaloa ma ia apoapoai i le Komesina o leoleo ina ia tutumau ma tausisia lana tautinoga e faasino i le faia o ona tiute ma le faamaoni.
O le Loia sili a le Malo le afioga Tuatagaloa Aumua Ming Leung Wai, na avea ma sui o le Malo e faailoa i le faamasinoga le filifiliga ua taunuu i ai le sailia o se Komesina o leoleo lea ua tofia i ai le susuga Egon Lincoln Keil.
Na molimoli le faafetai a le Komesina i ona aiga ma uo faapea le pitolaau a le aufaasalalau ma tusitala i le auai atu i le sauniga, ma sa ia toe faailoa ai lana mau tauave, o le faia o ni suiga mo le lelei o le matagaluega o leoleo.
O ni suiga na ia faaalia o le a lē faigofie auā o le a ia taumafai i le mea silisili e faatumau ai le talitonuga o tagata ma le atunuu i le galuega a leoleo. O le a mautali foi le matagaluega ma ia o le faauluuluga i taimi uma, pe a iai ni faaletonu ma ni faafitauli o le a tulai mai i le auaunaga ma le tautua a le matagaluega.
O se galuega foi na ia faaalia i luma o le toatele na auai aemaise o nisi o komesina lagolago ma leoleo sinia, o le a matala ai le faitotoa o lona ofisa i soo se taimi i le au tusitala ma le au faasalalau, peitai o le a iai lava nisi mataupu o le a lē mafai ona tali i ai ona o tulaga i galuega faaleoleo.
O le mae‘a o le faatautoga mo ona tiute faaleoleo na feiloai atu ai le Komesina i le Minisita o leoleo, falepuipui ma le tineimu le afioga Sala Fata Pinati, mo le sainia o lana konekarate e tolu tausaga. O le konekarate o loo aiaia ai le mafai ona toe faafou pe a mae‘a le tolu tausaga muamua e fua i le filifiliga a le Malo.
O le afiafi o le Aso Faraile na tea nei i le maota o Tuiatua Tupua Tamasese Efi i Sogi na aloaia ai loa le faatautoga o le alii Komesina faatasi ai ma isi faauluuluga o matagaluega ma faalapotopotoga a le Malo, ua filifilia.
O se sauniga foi na faatauto ai ma le afioga i le Tamaaiga Tuimalealiifano Vaaleto‘a Sualauvi II, mo le toe faaauauina o lona tofiga o le Sui o le Fono a Sui Tofia, poo le Sui Ao mo le isi lima tausaga.
