O le afioga ia Asiata Pene Sumuletu Pati ma lona faletua ia Iulieta Pati sa fomaipasi i Samoa i le falemai i Motootua i le tele o tausaga a o lei malaga mai i Niu Sila. E toafā o laua alo, e toalua tamaitai e matutua faatasi ai ma tama laiti e toalua lea ua lauiloa nei i le la aufaipese faatasi ma lo la tausoga ma ua faaigoaina o le SOL3 MIO.
O le afioga ia Asiata Pene o se tamā o loo iai le taleni pese ma e fiafia e tata lana kitara ma usu ana pese pe a oo i le taimi o ana galuega i totonu o le falemai faatasi ai ma le mānava o galuega i lona aiga.
Sa iai se moemitiga sa faananau i ai le tama i Samoa i lona fia alu e pese, ae o le faafitauli e leai se tasi e tausia lona aiga. O le tausaga e 1989 na tuua ai loa Samoa e le tina ia Iulieta ma ona alo e toatolu ae malaga mai i Niu Sila e saili manuia auā se lumanai o le aiga ma le fanau.
O le tasi tausaga o le alii matua o Pene ma masina e 6 na malaga mai ai ma lona tina, a o lona uso laititi o Amitai sa fanau i le falemai i Middlemore i le tausaga lava lea.
Na galulue lenei ulugalii i se tasi o falemai o tagata matutua o le Pacific Retirement Hospital i Magele, lea sa avea ai Asiata ma Hospital Manager, e galulue faatasi ai ma lona faletua.
Na faaauauina le meaalofa a le tamā ia Asiata i totonu o lea falemai i lona tāina o le kitara ma pese e faafiafia ai tagata matutua. Ma o lea falemai sa avea o se falemai e malaga mai ai le Ao Mamalu o le malo o Samoa le Susuga Malietoa Tanumafili II ma fai ai ana siaki a o soifua.
O le fiafia ma le faananau o mātua matutua i le mālie o pesepesega a le fomai ia Asiata na maua ai ma le avanoa e fai ai le latou aufaipese ma lana fanau e ave e faafiafia ai tagata matutua, ma sa maua ai foi le avanoa o le Ao o le Malo e faafofoga ai i ia faafiafiaga. O le tele o le taimi sa faafiafia ai nei tamaiti i totonu o le falemai, ma o le faulai foi lea o manuia na faamanuia ai mātua ia i latou faatasi ai ma o latou tuaa.
I afiafi o Aso Faraile taitasi sa faatulagaina e le fanau mo aoga pese auā latou polokalame mo le falemai a o laiti, ae o afiafi o Aso Sa, o afiafi faaleaiga lea e faafesoaa‘i ai mātua ma le fanau auā le manuia o le aiga.
O le tele foi o le faaaogāina o laua olaga aoaoina sa amata mai i totonu o le Aoga Aso Sa ma le olaga talavou sa galulue ai i totonu o le autalavou Metotisi Samoa i Magele, lea sa oo ai lava ina latou pueina le CD pese a lea Ekalesia.
O le alii o Pene na amata mai lona ola aoaoina i le aoga a le Sailoh Kindergarten Buckland Road i Magele ona see atu lea ma aoga i le Mangere East Primary School, na sosoo ma le Kitley Intermediate School i Papatoetoe, ma o aoga foi ia e lua na alu atu ai lona uso laititi ia Amitai ma aooga faatasi ai.
Na faaauauina la aoaoga i le Kolisi o Aorere ma maua ai le avanoa e auai i le Graduate Choir a lea Kolisi, ma o le auso muamua lea ua mafai ona auai faatasi i totonu o lea aufaipese a o lei atoa le ta‘i 15 o o la tausaga.
O le naunautaiga o mātua ia faalautele le meaalofa ma le taleni, ma sa iu ai ina finau le tamā e ave lana fanau i le aoga tapiano i Onehunga a le susuga ia Mr Maskel o se tasi o faiaoga o le Graduate Choir a le aufaipese a le Kolisi o Aorere.
O le faaiuina ai o lo la taumafai i totonu o le Kolisi ma maua ai le avanoa e ulufale atu i le Iunivesite i Aukilani. O le manaoga o le alii matua ia Pene e fia ave lana faaloia, ae o lona uso laititi e fia ave lana faafomai.
O le iai o Pene i totonu o le Iunivesite na maua ai lona avanoa e faalogologo ai i le polokalame a le aoga musika a le Iunivesite, ma tauanau ai e se tasi o faiaoga musika e alu atu e usu sana pese auā o loo toatele foi tamaiti Pasefika o loo auai. Na talia e Pene le valaau, ma sa avea ma auala na piki ai loa i totonu o le aufaipese.
O le suia o lona mafaufau na ia faamautu ai i lana filifiliga e tuu lana faaloia ae ave le faamusika, ma sa ia talanoa i ona mātua e tusa ma lana filifiliga. O lagona faamatua e naunau e fai ni galuega lelei ma mautu, ma sa fesili foi i ai ona mātua e mafaufau poo se galuega moni lea mo ia, auā o le toatele o tagata ia o loo pepese e alu alu lava ma tuu.
Ae sa lē tuua ai lava le naunau o le atalii e fia aoga musika, ma sa iu ai lava ina tafa se lagona o ona mātua e tuu ia e fai le mea o loo manao ai.
I lona auai i totonu o le aoga musika na tata‘e ai lona fatu e le faaupuga a se tasi o faiaoga e faapea, e tuu e maimau lona taimi, o fanau Pasefika e paiē, e augatatā, e lē mafai ona faamanuiaina, ma sa ootia lona loto i lea faaupuga auā e foliga mai e vaai maualalo nei tagata ia i latou.
Sa ia tali atu i le faiaoga, o lea o le a ou tago e faailoa atu ia oe le mea e ta‘u o le Opera, ma o le mafuaaga tonu lea na ia finau malosi ai ia tini lau o lona faamoemoe. Sa faamanuiaina foi i malaga i atunuu i fafo a o iai i le Graduate Choir ma le International Choir a Niu Sila.
O le tausaga e 2009 o lona taimi muamua lea na auai ai i se tauvaga pese na faia i Rotorua a le New Zealand Aria, ma lona faamoemoe e fia maua le poto masani e alu ai i totonu o tauvaga, ae peitai na mae‘a le polokalame ma faamanuiaina i le tulaga muamua, faatasi ai ma le isi o ana faailoga o le Promising Voice.
Ae o le 2010 na malaga ai loa i Ausetalia i lana sikolasipi i le tauvaga sa faia ai, lea sa ia maua ai le tulaga lua. I le mae‘a ai o lea faamoemoe na piki ai loa e se tasi o faamasino mai Wales e tatau ona malaga i Wales e faamae‘a ai lana Master, ma sa ia faaaogāina lea avanoa. Ae o le totogi o lea aoga pe tusa ma le $40,000.00 lona faatupeina. O lea sauniuniga na maua ai le avanoa e pepese toatolu ai Pene, Amitai ma lo la tausoga le alii o Mose, i le latou sailiga seleni.
O lona uso laititi o Amitai na ia ausia foi le avanoa e ulufale atu ai i le Iunivesite ma lona loto finau e fia fomai, ae peitai ua suia foi lona mafaufau ina ua ulufale atu i le aoga, ae tauanau e lona uso e alu atu e matamata ma faalogologo i le polokalame a le aoga musika a le Iunivesite, ma o lea e usu ai lana pese.
Na mae‘a le polokalame ae musumusu ai Amitai ia Pene, E sili atu le mea ou te faia nai lo oe. Ma sa suia ai foi le mafaufau o le alii o Amitai ma ia talanoa ai foi i ona mātua e fia alu e ave lana faamusika. Ae o le tali a ona mātua e mafaufau poo se galuega moni lea mo ia. E ui i se naunau o mātua ae sa tuu lava i le manaoga o le atalii.
O le auai o Pene i Wales na maua ai ma le avanoa e avatu ai lona uso laitiiti ia Amitai faapea le alii o Mose e aooga ma faagasolo a latou polokalame e pei ona lauiloa ai i le lalolagi atoa i le aufaipese o le SOL3 MIO.
Ae na faailoa se lagona o le tamā ia Asiata Pene i lana fanau, o nei aualii e toalua, mai lava o laiti e faifai mea faatasi, e taaalo faatasi, ma e tumu foi i le faaaloalo i so o se tagata, ma e fiafia foi e tautala i le Faasamoa. Ma o le alii matua ua mae‘a nei ona faaipoipo atu i le tamaitai Aikupito, ma o se tamaitai e fiafia foi e Opera e pei o lana manamea.
O le faamoemoe maualuga a le SOL3 MIO, a faamanuiaina le taleni ia mafai ona fesoasoani i fanau Pasefika i le faamalosia o le musika ma le ola aoaoina, faatasi ai ma le lagolago malosi o mātua.
O se fiafiaga sili foi lea ia Samoa atoa ona o se tasi lea anavatau a le atunuu ua mafai ona agiagia ai le fu‘a o Samoa i soo se atunuu o le lalolagi o musika.
