O le malaga a si alii Samoa mai Niu Sila, o Christopher Limu e asiasi i ona mātua i Samoa, ae pagā lea ua lē tau lau o le faamoemoe i ni fuafuaga na faatulaga mo lea malaga, ina ua faafuasei ona faamuta lona soifua i se faalavelave tau taavale ma aafia ai i le taeaopo pe tusa o le 7am i le taeao o le Aso Gafua o le vaiaso talu ai, a o faatino e Limu se gaioiga alofa e laveai ai ola o nisi o fanauiti na semanu o latou tonu e aafia i lenei faalavelave mai se avetaavale faatamala.
O le tulai mai o lenei faalavelave i Samoa, na ta‘ua i nisi o lipoti mai alaleo faasalalau i Samoa, o le susuga Limu sa savali i autafa o le auala faatasi ma se isi ma sa iai faatasi ma ni fanauiti sa agai atu faatasi i se faleoloa i totonu lava o le latou afioaga i Falefa, ae vaaia ai e Limu se vaaiga matautia e ono lamatia ai ola o nei fanauiti, ma ia faia ai loa se gaioiga toa o lona aapa atu ma unai malosi ese atu nei fanauiti lea sa agai sa‘o mai i ai le tifa a le taavale, ae ua avea ma itu ua sefe mai tamaiti ae ua amo e lenei atalii le ogaoga o le faalavelave ina ua tugā ona manu‘aga mai lona lavea.
O le taimi nei o loo taofia i le vaaiga a leoleo le avetaavale o le taavale na tupu ai le faalavelave, o Vavao Monike o Falefa, ae na ta‘ua i lipoti, o le avetaavale sa i lalo o aafiaga o le avamalosi mai se inugaava na auai ai i le po muamua atu a o lei malama le taeao na tupu ai lenei faalavelave, atonu o le faapogai o le alu saosaoa o lana taavale.
I nisi o molimau a i latou e silafia vavalalata lenei alii ua maliu, na latou faaleo ai lagona o le faanoanoa, ona o Limu o se alii e tumu i uiga tausaafia ma le faaleuo, ma o le aumai ai o le tala i le auala ma le mafuaaga na maliu ai, na molimau ana uo nei, o le ituaiga moni lena o tagata sa iai Christopher Limu a o soifua mai, e fiafia ma nofosauni e faia se galuega alofa mo nisi tagata, pe i lona aiga, i ana uo poo lana ekalesia.
O loo fuafua o le Aso Lulu nei, 21 Oketopa 2015, i le 10am i le taeao o le a faia ai toe sauniga o le susuga Christopher Limu i le Ekalesia LifeChurch i Manurewa sa lolotu ai ma ona mātua, ma faamavae atu ai ona aiga ma uo i lenei alo o le atunuu.
E momoli ai faamaisega ma moomooga alofa i le aiga faavauvau, uō ma i latou uma ua aafia vavalalata i le tulai mai o lenei faalavelave faafuasei ua motusia ai le mafutaga ma le atalii pele.
