O le feau tāua o le galuega ua faagasolo nei a le Faalapotopotoga o le Faatāua le Ola, o lea lava e faaigoa ai le Faalapotopotoga fesoasoani.
O se feau na fofogaina i se mafutaga na faatautaia ma sui o le afioaga o Lalomanu i Aleipata, ina ua agai i ai lenei Faalapotopotoga mo le faapupula lea o le tāua o le soifua o le tagata mai i tamā ma tina matutua e oo lava i fanau laiti.
O le uluai afioaga lea ua agai i ai lenei Faalapotopotoga ma o le susuga i le faafeagaiga o le EFKS i Lalomanu ia Rev. Etisone Gafa ma lana Ekalesia na talimalo i le Faatāua le Ola aemaise foi o tupulaga talavou, ma mātua o Ekalesia e pei o le Ekalesia Katoliko, le Ekalesia Metotisi ma le Ekalesia a Iesu Keriso o le Au Paia o Aso e Gata ai.
O le faalauiloa na faatautaia na faapea foi ona auai atu ai ma le tamaitai pese lauiloa a Niu Sila, le alo o Samoa o Annie Grace Tonumaalii ma lona aiga, aemaise lana aumalaga na faatasi mai mo sana koneseti i Samoa nei.
O lana foi unai e pei ona iai lana koneseti lea i Samoa o le tāua o le soifua o le tagata ma le faamuamua e ave pea i le Atua e ana le ola.
O aoaoga a le Faatāua le Ola na vaavaai ai i le itu lea o le ola o le tagata o se meaalofa mai i le Atua ma e tatau ona ave i ai le faatāua ma le faamuamua a soo se tagata. O vaega tāua o le soifua e pei ona unaia e lenei Faalapotopotoga, o le faatāua o le mafaufau, faatāua o le tino ma le faatāua o le agaga.
O le maua o le agavaa ma le tomai e fuafua lelei ai le soifua o le tagata, e manatu le Faatāua le Ola, e laitiiti ai faafitauli e feagai ma le tagata ma o le taulai o nei aoaoga ma le unai o le tupulaga talavou e pei ona faagasolo ai nei polokalame faalauiloa.
O aoaoga nei na ta‘ua foi e sui o le Faatāua le Ola e taumafai ina ia ausia e tupulaga talavou o latou faamoemoega i le itu tau i aoaoga, o galuega, o taaloga ma le ola tuputupu a‘e o se tama ma se teine talavou e faaaloalo ma faatuatua. Ia faaitiitia sauaga i totonu o aiga aemaise o vevesi i le va o tamaiti aoga ma vevesi i le va o nuu. Ia taofia sauaga matagā e faia i tupulaga talavou ma ia mafai e tupulaga ona talanoa atu i isi tupulaga ma taumafai ai e taofiofi le agai o nisi o tama ma teine talavou i le faaiuga e pule ai i le ola.
O le faatalatalanoaga lenei na lāgā ai foi nisi o faafitauli e tele ina feagai ma tupulaga talavou, ma o se auala ua mafai ai e tupulaga ona aumai nisi o mataupu e faigata ona talanoaina i le va ma mātua i luma o le feiloaiga lenei ma isi tupulaga talavou aemaise o i latou o le Faatāua le Ola, ua tele tausaga o feagai ma faafitauli eseese e avatu i lo latou ofisa.
O loo iai le tautua e ala i telefoni e fesoasoani i ai le au faufautua a le Faatāua le Ola i soo se tasi e moomia le talanoa i ni ona mafatiaga ma faanoanoaga.
O se auaunaga ua tele ina faaaogā e le toatele ma ua manatu le Faatāua le Ola, a faaopoopo i ai ma le agai i tua ma faatalatalanoa nei faafitauli, ua mausali ai le fesoasoani e ofo atu i le atunuu.
