Sa tumutumu ai le mamalu o aiga, uo, ma aumea mamae a le Ekalesia Peace Chapel i Magele, ona o le faamoemoe sa faatāuaina ai le Aso Faapitoa mo fanau a le ekalesia, i le Aso Sa na tuanai atu nei.
E pei ona iai i tausaga taitasi e masani ona faamanatuina faatasi ma le tele o Ekalesia Kerisiano lea aso tāua mo le fanau, ae talu ai ona o nisi o tuatuagia sa a‘e ai se tofa o le a tolopō i le vaiaso o le aso malolo o le Leipa Day pei ona feagai ai ma le faaiuga o lenei vaiaso.
E matagofie naua sauniuniga na tapenaina foi e le fanau e amata mai lava i le fanau laiti seia oo atu foi i le vasega o le au talavou. Na faaalia e le tamaitai ua faauluulu i ai le Aoga Aso Sa a le fanau o Barbara Faulalo, o a latou tapenaga na faaautu i mataupu na aoaoina i lenei tausaga ua faaulutalaina ‘O fua o le Agaga’.
E maeu le matagofie o le faalogologo atu o mātua a o pepese mai le fanau i le taulotoina o fua o le agaga pei o le alofa, olioli, filemu, onosai, mataalofa, agalelei, faamaoni, agamalu ma le lē gaoia.
O tauloto, siva faaleagaga, ma pese na faaautu uma lava i lea autu. Sa faapea ona silamio le mamalu na potopoto i le matagofie o tapenaga a le fanau. E leitioa le faisalamo, “O le fanau o le tofi lea mai le Atua…e pei o u fanafana i le lima o le toa, e faapea lava atalii o taulelea. Amuia le tagata ua tumu ai lana utu….” O se luitau tele foi lea na tuuina mai e le fanau i le mamalu o mātua ma le aofia na potopoto i lea taeao, ina ia suesue ane le tagata ia te ia lava, pe faamata o fua mai nei uiga i o latou olaga i aso taitasi.
Sa taualuga le aso i le toonai na saunia e tamā ma tina o le Ekalesia auā le fanau, faapea foi le mamalu o aiga ma uo na asiasi atu e molimauina le faamoemoe o le fanau. Sa faapea ona ave foi le faamuamua e tausasami muamua ai le fanau ae fai e mātua feau e pei ona masani ai le atunuu i aso ua mavae. O se vaaiga matagofie tele ua seāseā foi ona toe faamamafaina i nei ona po.
