Faataua fesootaiga a tusitala ma Taaloga

Ua tele lava faamatalaga ua talafo, ua tuua‘ia ai nusipepa, leitio ma televise ile faaitu‘au o a latou lipoti male tele ole taimi e ave ini nai taaloga ae ua lē aofia uma taaloga ile latou faamuamua.

O faitioga lava foi ia na folasia ile fonotaga na faatautaia i Samoa nei ile vaiaso ua tea e faatatau i auala e saga faaleleia ai faasalalauga o taaloga i totonu o Samoa.

Ole toatele na faitio faapea e tele lava ina ave le taimi o ofisa faasalalau ma nusipepa i taaloga e pei ole lakapi, le lakapi liki faapea ai male soka ae e tele ina faatuatuanai i isi taaloga aemaise o taaloga laiti i totonu ole atunuu. O lea na valaaulia ai sui o ofisa faasalalau ma nusipepa i lea fonotaga e faamatala le latou foi pitolaau pe aisea e faapea ai le lē atoatoa ole lipotia o taaloga ile atunuu.

Ole toatele lava ua faaali le manatu, ole leai ose taimi e mafai ona agai lelei e faatino lipoti, o nisi ole itu lea e tele lava ina valaau atu na o taaloga ia e tele ina vaaia i luga o televise ma fofogaina i luga ole leitio ma a leai lava se tasi e agai atu e lipoti a latou taamilosaga ma aoaoga poo atinae e faatino, e leai foi se faalauiloa e mafai ona ave iai.

Na fautuaina foi le toatele o sui o asosi nei o taaloga, e tatau ona vave logo atu a latou taaloga ma taamilosaga ona ole itu lea, elē o taimi uma e avanoa ai tusitala male ‘au faasalalau i polokalame e talosaga mai ai ile taimi mulimuli ona e tele foi isi polokalame oloo faagasolo ale atunuu e moomia ai foi le ‘au faasalalau.

E tatau ona manino foi tusitala ile faagasologa o lea taaloga ma lea taaloga ma e moomia le lava o fesootaiga faifai pea ina ia masani ai foi tusitala latou i lea taaloga ma lea taaloga. Faaalia e Apulu Lance Polu le Peresetene o le Asosi o Tusitala a Samoa, e ese le tāua o lenei taumafaiga ina ia maua ai le malamalama o itu uma e lua i luitau ole faatinoga o galuega faatusitala male tāua ole lelei male malamalama foi o i latou ile tāua ole unai a asosi o taaloga ia latou taaloga taitasi.

Faaalia e nisi pe aisea ua tele ai lava le TVTasi mo se faataitaiga ile faalauiloa ole taaloga ole lakapi ae faatuatuanai isi taaloga ma ole tali na ave i ia asosi, ua tele tausaga o unai ele Iuni Lakapi le lagolago ale atunuu, ma ole tele ole tupe e maua e nusipepa ma leitio ma televie e sau mai ile lakapi ona o a latou atinae e faatino, le maualuga ua oo iai tausinioga o ana ‘au eseese aemaise ole tele ole lagolago oloo maua ai a ofisa faasalalau mai i kamupani tetele oloo totogia le aumai tuusa‘o o taaloga nei mai fafo.

Ole lakapi liki le isi taaloga ua matauina le alualu i luma ole numera o tagata i Samoa ua maimoaina, ma ua maua ai foi la kamupani e lagolagoina le aumai o a latou foi taaloga i totonu o Ausetalia.

Ole taaloga ole soka le isi taaloga male taumafaiga oloo iai nei e ui ile tau leai ose seleni o maua ele Asosi Netipolo, ae ia maua mai lava ni nai taaloga mai i Niu Sila mole maimoaga ale toatele e mulimulitai foi i ia taaloga.

Ua iai nei la ni maliega ua faamautu ile va o ofisa faasalalau ma asosi o taaloga i auala e mautinoa ai le lipotia o taaloga eseese i luga o talafou ma faasalalauga atoa o taaloga i isi polokalame a ofisa faasalalau e pei o fale televise.