“Ia Mafuta Pea ia Ieova”, o le ‘au‘au poo le matua autū lena o le Tauaofiaga Itumalo a le faatuatuaga Molimau a Ieova, e pei ona sa tauaofia ai mo aso e tolu (14, 15 & 16 o Aukuso) i lo latou maota fono i Papakura.
O lena matua autū o le tauaofiaga atoa sa faavae mai upu a le soo o Iakopo o loo faamauina i le Iakopo 4:8, “Ia outou faalatalata atu i le Atua, ona faalatalata mai lea o ia ia te outou.” E talitonu Molimau a Ieova, e ui i le tele o manatu ma filosofia feteenai o loo salalau i lenei vaitau e uiga i le Atua, ae ua faamautinoa mai e le Galuega 17:27, ‘e lē o mamao ese le Atua ma i tatou.’ E ese mai le matua autū o le polokalame atoa, sa tofu foi aso taitasi ma lona matua e taulai i ai lauga uma o lena aso.
Ma o le tele o lauga, faataitaiga, faatalanoaga faapea foi ma le tala faale-Tusi Paia sa faatinoina i le Aso Sa o le polokalame, na taulai uma atu lava i le faamalosia atili o le mafuta vavalalata atu o le tagata i le Atua, e ui i le tele o fatia ma luitau o loo faamata‘uina ai lona soifua faaleagaga, ma sa iai lauga na uai patino atu lava i matafaioi a sui taitasi o le aiga, le tane, avā ma le fanau.
O faatasiga nei faaletausaga e tāua tele i soifuaga tapuai o soo se Molimau a Ieova, o taimi o le toe tapueina atili o le soifua faaleagaga, ina ia faaaupegaina atili le Kerisiano ia malosi ma nofosauni i soo se taimi e manumalo pe a luitauina lona faatuatua.
Ma e latou te faia taumafaiga uma ina ia faamautinoa e lē misia se vaega o lenei polokalame faaleagaga.
O le polokalame i le faaiuga o le vaiaso talu ai sa patino i faapotopotoga poo aulotu Samoa e 7 a Molimau a Ieova i Niu Sila atoa, e 5 i Aukilani, tasi i Ueligitone ma le tasi mai Kalaiesetete.
O nisi o vaega matilatila o nei faatasiga faaletausaga a Molimau a Ieova, o le tatalaina lea o ni lomiga fou faale-Tusi Paia, e faaaogā ia latou tapuaiga, suesuega, aemaise i la latou galuega talai mai lea fale i lea fale ua lauiloa ai i le lalolagi aoao.
O le isi vaega sili ona tulimataia i faatasiga nei, o le papatisoga i le vai, o le faalauiloaga lea i luma o se aofia atoa e molimauina, le tautoga ua uma ona faia e le tagata lava ia ma le Atua, o le a lafoaia le olaga tuai sa iai, ae ua tuuina atu nei o ia e ola ma faimea faalogo ia Ieova le Atua i lona olaga atoa o se Kerisiano. Ma e to‘a 9 i latou na papatisoina i le tauaofiaga o lenei tausaga.
E silia i le valuselau le aofia sa iai i lea tauaofiaga i le gagana Samoa, ae o loo faagasolo pea tauaofiaga a faapotopotoga i le gagana Peretania, o loo faaaogā ai nofoaga e pei o le TelstraClear i Manukau, ona o le toatele o na aofia.
E tutusapau lava le polokalame o le a faagasolo i le gagana Samoa i isi atunuu e pei o Ausetalia, Hawaii, Tutuila ma Samoa.
O faatasiga nei a le ekalesia Molimau a Ieova, e tasi lava le taulaiga autū, o le fafagaina atili faaleagaga o o latou tagatalotu, e ui o se taimi foi e tulimataia e o latou sui auai uma ina ia feiloai ai ma faamasani atu i isi o latou uso ma tuafāfine mai isi faapotopotoga eseese.
O le uso o Don Harris sa avea ma failauga faapitoa mai le ofisaulu o Molimau a Ieova i Manurewa, na te fofogaina nisi o lauga autū o le Tauaofiaga, aemaise lauga na tatala ai ma se lomiga fou.
