Ausavali a Otara Walking Samoans

Ausavali a Otara Walking Samoans

O le faatāuaina o le vaiaso o le gagana Samoa i totonu o Niu Sila, ua le gata i aoga ma galuega, ae ua oo foi i faalapotopotoga a Samoa i Aukilani ua latou patipatia le tāua o le gagana Samoa i lenei atunuu.

O le talitonuga o nisi o tagata matutua o loo auai i le savali o le Walking Samoans, o le gagana Samoa o le meaalofa foai fua mai lea e le Atua mo Samoa.

O Samoa e telē le tāua o lana gagana ae ua o faatasi ma lana tu ma lana aganuu, ma e ‘oa foi lana gagana i soo se vaega o lana aganuu.

O le Aso Tofi o le vaiaso ua mavae na faamanatu ma patipatia ai e le au savavali o le Walking Samoans i Otara le tāua o le vaiaso o le gagana Samoa.

Ua matagofie laei e ala i puletasi a tina ma tamaitai ae ua oo foi i laei ofutino o tama ua laugatasia uma ai le au savavali ona o le naunau lava ia aua ne’i mamae le tāua o le aganuu o Samoa.

Ua tatala le avanoa i tina ma tamā matutua, e faasoa mai ai i le tāua o le gagana a Samoa aemaise o lana aganuu.

O nisi la o tamā ma tina na faasoa i le faigata o le olaga sa iai aso la, i le taumafai mai o matua e saili se seleni auā aoga, ma le tausiaina o le aoga.

O tamā na faamatala le tāua o le olaga tautua i totonu o le nuu ma le ekalesia, aemaise lava i taimi o fono a matai o le nuu.

O iina e faasino ma aoga ai le tama ma le teine i le tautuaina o lona nuu ma lona aiga.

O le faaaogaina o le gagana tautala, o le tu ma le agaifanua e tatau ona fai, faatasi ai ma lana tu faaaloalo i le va ma isi tagata. Faasoa foi nisi o tina i le soifuaga o le teine talavou i Samoa ma le tulaga o le tamaitai i totonu o lona aiga ma le nuu pe a oo ina tauaofia matai i se potopotoga.

O nei faafeasoaa’ina na avea o se auala e toe fafagu ai i fanau talavou sa auai i lea aso le faigata o le soifuaga na ola mai ai matua, a’o lea lava ua oo mai i nei atunuu o loo tausisi lava ma apoapo le tāua o le gagana Smaoa ma lana aganuu.

O le matagofie o lea aso, ona sa auai atu ai nisi o i latou o loo vaaia le komuniti hall i Otara, ma latou faailoa ai i le au savavali a Otara, e le o toe mamao se taimi ona tatala loa lea o le community hall lea sa latou faaaogaina auā le toe faaauauina o polokalame a le Walking Samoans i lea pitonuu. Ma ua faailoa ai foi ua faapitoa lava se potu mo tagata Samoa auā le faatinoina ma le faagaioiina o polokalame Samoa i totonu o Otara.

O le agaga faafetai foi lea a le tofa ia Teleiai Edwin Puni ma le tofa ia Sooalo Setu Mua, i le pulega o le hall ona o le amanaiaina pea o le ausavavali a Otara.

E tiga lava ona toe faafou le fale ae o lea lava o loo maitauina o loo latou fesoasoani pea i le unaia malosi o le soifua maloloina o tagata lautele o le atunuu.

Na faaauau le mafutaga a le au savavali i le latou taligasua sa fai, i le tele o kuka ma taumafataga na saunia lava e le Walking Samoans a Otara.