E silia ma le to‘a 20 le aufaigaluega a le kamupani e gaosia fagu e faato‘a ai le yogurt, le kamupani a le EasiYo, na tufatufaina o latou tusipasi ina ua mae‘a se polokalame tau a‘oa‘oga sa latou auai atu i ai mo le toe tapueina ma faaleleia atili tomai ina ia malamalama lelei i le tusitusi, faitau tusi i le gagana Peretania, aemaise foi i fuainumera.
O se uluai polokalame lea ua faia e le kamupani, e pei ona aooga ai le aufaigaluega a se tasi o o latou lala i North Shore.
O le vaega a le Skills4Work na latou tapenaina lenei a‘oa‘oga, ma o se polokalame aogā tele aemaise lava i nai tagata faigaluega, e lei iai lava se avanoa na latou muai a‘oa‘oina ai le gagana Peretania poo le malamalama i faaaogāina o fuainumera.
O nisi o i latou atonu e faimalaga mai atunuu e seāseā pe matuā lē faaaogāina ai lava le gagana Peretania, pe sa lei lelei foi ona aooga mo le a‘oa‘oina o nei tomai.
I se pepa o faamatalaga o loo ta‘ua ai le a‘e o se tofa i le susuga i le alii pule sili o le EasiYo, Paul O’Brien ina ua tulai i le tofiga i le tausaga talu ai, e tāua tele le faia o se a‘oa‘oga faapea, ina ua matauina e fai si toatele o le aufaigaluega e lē o lava so latou malamalama i le gagana Peretania i le tusitusi poo le tautala ai foi.
Na manatu O’Brien, o le iai o se malamalamaga o le aufaigaluega i le gagana, o le a faigofie ai fesootaiga a tagata taitoatasi i totonu o le galuega, o le a mauaina e tagata uma le mautinoa i le faatinoga o a latou galuega, ma e iai foi le aogā i le tulaga saogalemu i totonu o le nofoaga o loo fai ai galuega, ina ia malamalama tagata uma i faatonuga mo le tausia o le saogalemu.
Ua avea foi lea tau lagalaga ua atili ai ona iai lagona naunau o le au faigaluega e saili atili atu i nisi foi tomai, e pei o le itu i saunia o le tulaga saogalemu o taumafa, o le tulaga lelei o oloa o loo gaosi, e oo lava foi i tomai tau le pulega i totonu o fale faigaluega. O vaega sa agai i ai lenei a‘oa‘oga i le gagana Peretania, e aofia ai le tautala, faitau, faalogologo, tusitusi ma fuainumera.
E toatele nisi sa auai i lenei polokalame sa faaleo o latou lagona talisapaia i lenei fesoasoani tele ua latou maua, e lē gata e aogā i le faatinoga o latou galuega, ae i le soifuaga lava foi i aso faisoo.
EasiYo
O le EasiYo o se kamupani Niu Sila na faavaeina e Len Light i le tausaga e 1992. Faapea se faamatalaga, na amata lava e lenei alii ona gaosia ana fagu nei e gaosi ai le yogurt, mai le vaega pito i lalo o lona faletaavale.
E lei umi ae amata ona lauiloa atu ma ua avea o se oloa e matuā alumia i totonu o Niu Sila ma Ausetalia.
I aso nei, e silia ma le 20 atunuu o le lalolagi ua maua ai pepa pauta ia e amata gaosi ai le yogurt i le fua a le Easiyo, ae 1.2 miliona fagu e faato‘a ai le yogurt ua uma ona faatauina atu.
