Ua aloaia le avea o faletalimalo a Aggie Grey’s i Samoa e le kamupani o faletalimalo i le lalolagi, le Starwood. O le kamupani lea o loo aofia i ana mau faletalimalole lala o faletalimalo ua faaigoaina o le Sheraton.
O le Sheraton Aggie Grey’s Resort la lea ua faamatuu aloaia atu i le faaiuga o le vaiaso na tea nei. O le faletalimalo telē lea e i Mulifanua e latalata ane lava i le malaevaalele faavaomalo i Faleolo.
O lea na amata mai feutagaiga ma le faatauga o lea faletalimalo i le lua tausaga talu ai peitai e lei aloaia lelei le avatu i le Starwood o lenei faletalimalo seia maea lelei ona toe fausia i le maualuga e tatau ona iai lenei faletalimalo i le laina o faletalimalo o le Sheraton i isi vaega o le lalolagi.
E 133 potu o lea faletalimalo fou ma ua telē le suiga i le vaaiga ua iai nei. O lea la ua igoa le faletalimalo lenei e ta‘ua o le Sheraton Aggies Resort. O le isi faletalimalo o le Sheraton o le faletalimalo lea e i Vaisigano, lea ua faapea ona faagasolo foi galuega i le toe fausia atoa.
O se taimi i le ogatotonu o le tausaga lea ua fuafua e faamae‘a ai le galuega ma aloaia ai foi lea vaega lona lua o lenei atinae tele. O faletalimalo nei e lua o atinae as le tina lauiloa ia Aggie Grey ua tele foi tausaga o avea ma mataaga mo Samoa i le atinae o tagata tafafao maimoa mai i fafo.
O se taumafaiga a lenei tina faipisinisio Samoa na faaauau e lona alo ia Laauli Alan Grey ma loa faletua ia Marina, ae o lea ua faaauau e o la alo ma faalautele atu ai i Mulifanua lea atinae.
Sa iai foi sea o le malo e ala i le NPF i nei atinae ma o le faatau mai e le Sheraton poo le Starwood o nei nofoaga tetele e lua, ua aofia ai le tupe maua e le aiga o Aggie Grey ae o le NPF foi.
E iai se isi atinae a lenei aiga ua faatuina nei i le motu o Tahiti ma ua ese mai i atinae tetele nei ua avatu i le Starwood. O le kamupani lenei e ana le Sheraton ma ua soo le lalolagi i ana atinae o faletalimalo.
O Samoa o le atunuu lona valu lea o le Pasefika ua faatu ai faletalimalo a lenei kamupani ma o le taimi muamua lenei ua iai ni faletalimalo i le maualuga lenei faavaomalo ua i Samoa, ma o se laasaga maoae lenei i le unaiga o le atinae o faletalimalo i totonu o le atunuu.
E iai le faamoemoe o le a tele se eseesega i le numera o tagata tafafao mai i Samoa i le iai o lala o le Sheraton i Samoa lava ia ma o se atinae ua faafetaia e le alii Palemia le Minisita foi lea o tagata tafafao maimoa mai i Samoa.
O le alii Palemia ma sui o le Malo faapea ai sui o le Starwood ma le Sheraton sa faatasi atu i le faaiuga o le vaiaso auā le sauniga puupuu e aloaia ai le igoa lenei o le faletalimalo fou ma le saunoaga a le alii o loo pulea le Sheraton i le Pasefika atoa, o se laasaga tele lenei i le taumafaiga a lenei foi kamupani tele ina ia faalautele ana auaunaga faa faletalimalo i itu uma o le lalolagi ma o le a faapea ona fesoasoani i lana atinae, ae o le itu silisili o le fesoasoani i le atinae o Samoa ma ona tagata e ala i le faaopoopo o tagata faigaluega ae o le tupe e sau mai i tagata tafafao mai i Samoa nei.
