Faatau le Tusi a Tim Cahill

Tim Cahill i le sainiina o tusi
Tim Cahill i le sainiina o tusi

O le vaiaso talu ai na taunuu mai ai i Ausetalia le alo iloga o Samoa ia Tim Cahill o le Soccerroos e saini ma faailoa lana Tusi i lona soifuaga lea ua faatauina nei i faleoloa ma faletusi i Ausetalia.

E pei ona silafia o lenei alo o Samoa o loo taalo nei i Saina i lana kalapu na suia mai ai Amerika. O Sini na amata ona sainia ma pueata ai Tim Cahill ma le au faatau tusi. O se tasi o alii Samoa ia Max Fatupaito na maua se avanoa e auai atu ai e faatau lana tusi ma saini faapea ni puega ata i le taulaga o Sini.

“O le tele o lenei tusi na o faamatalaga matagofie a Tim Cahill mo lona aiga, mātua uso ma tuafāfine. E faimeaalofa le tusi lenei a Tim Cahill ma molimoli ai ona alofaaga ma lana faafetai i lona tina ia Sisifo Tuato Cahill aemaise le tina o lona tina ia Faataualofa Tuato.

O le itulau muamua o le tusi o loo matamata tetele ai lenei Aualofa mai le tama soka aupito mataina a Ausetalia. O upu a Cahill, “Mo le tina o si o‘u tina, o Faataualaofa Tuato, soifua mai aso 3 Aperila 1932 ae maliu i le aso 27 Me 2005.

“O oe o le poutu o si o tatou aiga faatasi ai ma si o‘u tina ia Sisifo Tuato Cahill, faafetai mo la lua faasoaina ma le faamalamalamaina o la tatou aganuu ia te au nei ua ou mitamita ai o a‘u o le Samoa ma le feau aupito tāua o lona olaga, ‘Aiga mo taimi uma lava e lē suia’.”

O le Aso Sa na malaga atu ai i Canberra Tim Cahill mo se tasi o sainiga Tusi ma faalauiloa atu ai ma Samoa. O uiga lava nei lotonuu a Tim Cahill sa fai mai lava talu ona amata fesilisili ai tagata lautele ma le media i taimi o ana interview.

O se tusi e tatau na tofu kopi ai le fanauiti ma amata silasila i faamaumauga a Tim Cahill mo Samoa ma agaifanua. O le vaiaso nei na toe taliu atu ai i Saina mo lana konekarate.

O se meaalofa sili foi lenei tusi mo le Kerisimasi ma e na o le $26.99 o loo faatau ai i Sydney ma Ausetalia atoa.