O i latou uma na sa tupuga mai ia Pepe ma Tama‘i Aiga mai le afioaga o Toamua i Samoa

O i latou uma na sa tupuga mai ia Pepe ma Tama‘i Aiga mai le afioaga o Toamua i Samoa

E ui lava sa faigata ona tau amata ma tau fuafua mai lenei faatasiga, peitai o lea ua taunuu ma ua feiloai fiafia ina ua potopoto faatasi i Aukilani alo ma fanau a Pepe Aiga ma Tama‘i, ma i latou uma na tupuga mai ai.

Ose feiloaiga o loimata ole fiafia ina ua faatoa vaaitino le isi ile tasi talu mai le fia o tausaga o valavala.

E tusa ai ma le saunoaga ale Peresetene ale komiti sa faafoeina atoa le polokalama o lenei mafutaga, le susuga ia Akelly Apelu, na ia ta‘ua ai e faapea, e lei faigofie le tapenaga ole faamoemoe, peitai ole fesoasoani mai o alo ma fanau uma a si o latou aiga, faapea nai mātua lea na mafua ai ona faigofie auā ana leai le toatele o lima e lē māmā se avega.

Ole komiti sa faamaopoopoina lenei faamoemoe ole Peresetene o Akelly Apelu, Failautusi o Albert Faafetai ma le teuoloa ole latou tuafafine o Fatiatamai Pepe Aiga.

E lima aso na faataunuuina ai le Reunion lea na ulufale ile Aso Gafua 27 o Mati 2017 ae ta‘ape ile Aso Faraile 31 o Mati 2017. Ose faatasiga muamua lea ale aiga talu ona soifua mai ma ua faailoga ole a faia lenei faatasiga ile tai 3 tausaga. Ina ua ulufale le mafutaga, na amata lava ile sauniga lotu lea na taitaia ese tasi lava o tausoga poo lupe faalele ale aiga, le susuga ia Maiava Keti Maiava. Na mae‘a ona faagasolo ai lea o polokalame uma na faafoeina lava ele komiti.

E maeu le felanulanuai o polokalame ole vaiaso, auā na vaaia le fefiloi ai ma le soifua maloloina ile tele o taeao. E amata lava ile talosaga i taeao taitasi, ona sosoo ai lea ma le Zumba.

O taumafataga uma ole aso, e tatau ona paleni, lea e faatāuaina ai le tausami i fualaau ‘aina ma fualaau faisua.

Na fiafia le toatele o nai tamā ma tina matutua, ona e mae‘a ane le vaiaso atoa, ua vaaia le momosi o o latou fika ona ole maloloina lelei o a latou taumafataga.

O alo ma fanau a Pepe ma Tama‘i Aiga (L-R): Sualua Pepe Aiga, Nike Pepe Aiga, Puapae Pepe Aiga, Safua Pepe Aiga, Simoe Pepe Aiga, Opetaia Pepe Aiga ma Apelu Pepe Aiga (E le o iai i lenei ata): Laofie Pepe Aiga ma Faiva Pepe Aiga

O alo ma fanau a Pepe ma Tama‘i Aiga (L-R): Sualua Pepe Aiga, Nike Pepe Aiga, Puapae Pepe Aiga, Safua Pepe Aiga, Simoe Pepe Aiga, Opetaia Pepe Aiga ma Apelu Pepe Aiga (E le o iai i lenei ata): Laofie Pepe Aiga ma Faiva Pepe Aiga

O Pepe Aiga ma Tama‘i e mai le afioaga o Toamua. E toasefulutasi o la alo, ole ulumatua ole susuga ia Apelu Pepe Aiga, faasolo mai ai loa ile lona lua seia oo ile uii, Opetaia Pepe Aiga, Simoe Pepe Aiga, Safua Pepe Aiga, Puapae Pepe Aiga, Nike Pepe Aiga, Laofie Pepe Aiga, Sualua Pepe Aiga, Sue Pepe Aiga, ma le uii o Faiva Pepe Aiga, e toatasi ua maliu.

Ole mafutaga lenei ma manino ai, le tele o taleni oloo i totonu ole aiga, ona na molimauina ile latou faaaliga taleni ile po ole Aso Lulu ma le latou fiafia ile po ole Aso Tofi, le talenia o alo ma fanau na tupuga mai ia Pepe ma Tama‘i Aiga. O nisi o nei tamaiti e lelei ile faimusika, o isi e tusitala, ma ua mafai ona o latou tusia ni tusi. O nisi foi o i latou, e fai faleaitu ma aga mālie, ae o isi foi e faiaoga ma faifeau.

E le o toe po se lilo ile mamalu ole atunuu, ole afioaga lenei oloo tupuga mai ai le aufaipese lauiloa ale Tiamaa, lea na ta‘ua e se tasi o tina i lea po, oloo i totonu ole aiga lenei tamaitai e toalua, na iai ile faavaeina mai ole Tiamaa i lona faatoa amataina, le faletua ia Safua Pepe Aiga ma lona uso matua ia Simoe Pepe Aiga.

Ole mae‘a ai ole faatasiga lenei, ole a toe taliu ai le tagata lava ia ile vaega ole lalolagi oloo faamautu ai, lea na malaga mai isi mai Samoa, Amerika, Hawaii faapea foi ma i latou i totonu o soo se vaega o Niu Sila.

E toatasi e lei mafai ona auai mai, ole susuga ia Sue Pepe Aiga oloo faamautu i Amerika Samoa. Ole isi a latou faatasiga, ua fuafua lea mo Mati 2020 ile Laumua o Ueligitone.

Faamatalaga na tuuina mai

Comments

comments