E lē falala fua le niu, e mafua ona tasi loto ma gauai i se faamoemoe ona o se mafuaaga tatau ma le onomea. E iai le upu masani e faatatau i Tina ma Tamaitai i le fai mea mafai, “E au lava le ina‘ilau a Tina”.
Na masii mai le fala siigata e tali le faaaloalo maualuga a o tapuaia e le itupa malosi faapea faafeagaiga ma tamā sa taputapuai mai i nuu ma alalafaga, ma e lei faatagā faia pe faatemutemu tiute ma faiva masani ole itupa vaivai e pei ona faataunuuina ai se mafutaga tele sa tauaofia mai ai nisi o setete o Ausetalia, i le aso 20 e oo atu i le aso 23 o Me.
O le faamanatuina lea o le sefulu tausaga talu ona faavaeina mai le Mafutaga a Tina a Kuiniselani. O se faatasiga matagofie auā sa lei teena le valaaulia faapitoa mai Tamaitai o le Malamalama a Kuiniselani e le tele o isi Mafutaga sa tuuina aloaia atu i ai tusi valaaulia.
Na maua se avanoa e pa‘au mai ai Mafutaga a Tina ma Tamaitai e aofia ai ma faletua o faafeagaiga taulagi aemaise o tina matutua mai Mt Druitt Niu Sa Uelese, Minto, Merrylands faapea Melepone ma Cairns, faatasi ai ma aulotu e sefulu a Brisbane sa matuā faatumulia ai le nofoaga masani e tuufaatasia ai Ekalesia i Watsona Park, Dakabin i le itu i Matu o Kuiniselani.
Na matagofie lea mafutaga auā sa auai mai foi sui o Aukilani ma Dunedin i Niu Sila. E pei ona masani ai i aso ua mavae, sa igoa o le Toreka lea Mafutaga a Tamaitai.
Peitai ua faaigoaina i le taimi nei i le Women Ministry poo le Mafutaga Tamaitai Ekalesia Aso Fitu o le Toe Afio Mai i le lalolagi atoa, se‘i vaganā ai Brisbane lea ua igoa lava o Tamaitai o le Malamalama, ai ona ua suluia ave o le malamalama i le alofa matalasi o le Atua ua aulia mai ai lona sefulu tausaga, Viia le Atua. Na molimauina le feofoofotai o feiloaiga a le auuso ua leva ona valavala, i le faailoaina lea o le tele o galuega lelei o loo latou faia e pei o le asia o nai mātua matutua, o le asiasi lea i nai alo ma fanau e lē atoatoa le malosi o le tino ma le mafaufau, faapea le fautua lelei auā le atina‘e o le tele o itu lelei e manuia ai le galuega a le Matai.
O le taitai o le Mafutaga a Tina mai Samoa le faletua ia Su‘a Julia Wallwork sa lauga faapitoa. Na ia toe faamanatu pea sao tāua o tina ma tamaitai, e lē faatauagavale pe faatafa i ni fatia e ono tulai mai i totonu o aiga, e tatau ai la i tamā ona faatāuaina.
Na logo faatutuila itu uma o le lotoā na api ai Mafutaga eseese i le siufofoga mālie ma le mālū o aufaipese eseese ua muliga foi pesega a agelu faapea pese faaleaganuu, tala faale-Tusi Paia ma lauga. Sa taitaia lava sauniga paia o le Sapati e le Komiti Faafoe a Kuiniselani e pei ona fai sao ai le Peresitene, le faletua ia Emma Afamasaga, (faletua o le susuga ia Pastor Samuelu Afamasaga).
O le faletua ia Alofa Ah Shu (Sui Taitai) o le faletua lea o le faafeagaiga ia Pastor Ieti Ah Shu. O le Failautusi o le faletua Maranata Titimanu. Teutupe o Mamao Siope, Teutupe Fesoasoani o Lila Wilson, Failautusi Fesoasoani o Aofaga Feaveai (faletua o le faafeagaiga ia Pr Andrew Feaveai).
O le faletua ia Lata Faiumu (faletua o le faafeagaiga ia Tusitina Faiumu) ma le faletua ia Sinta Faanene, o le faletua o le faafeagaiga ia Aitui sa faamaepaepa i lea Sapati. E sefulu Mafutaga a Tina ma aulotu Ekalesia Aso Fitu i Kuiniselani.
