Faataoto polokalame a le Pulega o Aukilani mo le isi 10 tausaga

Ua vaavaai mamao le Pulenuu o Aukilani ia Tauaaletoa Len Brown ma sui o le Council i se isi alafua faataatia e agai i ai le atunuu i le isi sefulu tausaga o lumanai. O ia polokalame ua fuafuaina auā le agai i luma o tagata o le Pasefika aemaise lava i o tatou tagatānuu Samoa.

O le afiafi o le Aso Tofi, 19 o Fepuari na maua ai se feiloaiga a sui o le Council ma le atunuu aemaise i tagata Pasefika e talatalanoa ma faaata mai ai le finagalo o le Pulenuu ia Tauaaletoa Len Brown e tusa ma se fuafuaga ua faataoto mo le isi tausaga o le a savalia.

Na vaaia le taupati atu o le atunuu, i susuga i faafeagaiga sa auai, o faauluuluga o nisi kamupani, sui o ekalesia faapea sui o itumalo taitasi. Na auai foi nisi o tusitala i nusipepa ma leitio. O lenei feiloaiga na faataunuuina lea i le Manukau Civic.

E ui i le lē auai o le Pulenuu ia Tauaaletoa Len Brown ae sa mafai ona faatasi atu i ai le afioga ia Arthur Anae o se tasi foi o tamalii o le atunuu o loo galue i totonu o lenei faalagamaea, faapea le susuga ia Alf Filipaina ma nisi o taamalii o loo galulue faatasi ai i le Council.

O le susuga i le faafeagaiga ia Risati Lafaele na ia saunia le tatalo e amata ai lea feiloaiga, ae o le susuga ia Filipaina na saunoa e faatulima i le mamalu o le atunuu. O le fofoga o lea afiafi o le susuga ia Willie Iosia.

E 4 ni vaega na faataoto e agai i ai lea faamoemoe auā se finagalo o le atunuu, (1) Inivesi i Aukilani (Investing in Auckland), (2) Faaleleia o Femalagaiga (Fixing Transport), (3) Pili Masani tou te totogia (Rates), (4) Fale ma Atinae (Housing and Development).

Inivesi i Aukilani: Ua fuafuaina le $17 piliona e faaaluina i le sefulu tausaga o lumanai i le fausia o aseta fou, e pei o auala, paka, fale, faletusi ma galuega fai i le suavai, faatasi ai ma le toe faaleleia pe toe suia isi a tatou meatotino o loo iai. Ua iai foi se faatatau e tusa ma le 3.5 pasene i tausaga taitasi e mafai ona faatino ai inivesi ma tupe faaalu e pei ona fuafuaina.

Faaleleia o Femalagaiga: Ua faataoto mai le $6.9 piliona le paketi mo femalagaiga, o lona uiga ua 33 pasene e itiiti ifo ai nai lo le mea sa fuafuaina talu ai.

O le tele o auala o loo mananao nisi o tagata e tatau ona fausia auā lava le saogalemu o le soifua o le atunuu, e fuafua foi le filifiliga a le atunuu pe talia galuega faigofie mo femalagaaiga e itiiti se tupe e faaalu ai, pe tatou te mananao e faaalu se tupe tele i se galuega tele ua fuafua e oo atu lona aogā i le isi 30 tausaga.

Pili Masani e Totogia: O se tasi lea mataupu na taumafai i ai le toatele o le atunuu e fia malamalama atili ai o le tau o fale totogi aemaise o lou lava fale poo lau meatotino, i tau e tatau ona e faaaluina ai i lea tausaga ma lea tausaga, auā o le toe faatulagaina talu ai nei o tau e faatau atu ai le fale, ua aafia ai tau o le a totogi e tagata uma, auā e lē o fale uma na aofia i suiga ua toe faatulaga ai tau e faatau atu ai.

Fale ma Atinae: O se tasi lea manatu autu o lea feiloaiga o le itu i Fale ma Atinae e lelei ona faatulaga. E matuā unaiaina le faamautinoa ua tulaga lelei fale o loo maua, o se vaega o loo naunau i ai ia faaleleia le tulaga o loo soifua ai tagata uma o Aukilani.

O nei mataupu uma sa faapea ona vaevaeina i ai tagata sa auai i laulau taitasi ae talatalanoa poo le ā so latou finagalo i nei fuafuaga ua taoto mai. Sa faapea foi ona fesiligia e nisi o le atunuu le laulau a le Council sa auai e tusa ai ma latou fuafuaga fai, aemaise lava i nisi o fale faapitoa mo tagata Samoa lava latou.

E pei o le pitonuu o Magele ua iai hall ua ta‘ua ai tagata Tonga, tagata Rarotonga ae leai lava se hall o ta‘ua ai Samoa, ae sa lē mafai ona faama‘oti mai se tali mo lea vaega. Na ta‘ape le atunuu i lea afiafi ma le fesili tele i o latou mafaufau, pe aisea le mafuaaga ua lē maua ai se fale faapea mai le Council mo tagata Samoa.

Ma le isi vaega na peiseai e tai faamanu‘alia ai finagalo o le atunuu o le tele o fesili na tuuina atu i se tasi o tamalii o le atunuu o loo iai i le Pulega, ae poloka mai lava se manaoga o loo fia maua ai se tali. Ma na lagona ai se leo faapea, poo fai ea se galuega a nei sui o le atunuu mo o tatou tagata.

Mamalu o le atunuu sa auai i le polokalame a le Council i Manukau