E le’i lava le malosi o tama taaalo, e le’i amana’ia foi e tama le ‘Ofu ole Manu Samoa, ma le tagofia e tama ole ‘ava malosi o mea ia e lua na matilatila ile ripoti ale SRU ile faaletonu na o’o iai le Manu Samoa i lalo ole vaaiga a Namulau’ulu Alama Ieremia.
Na tofia ele SRU le Komiti Suesue, e aofia ai Masoe Norman Wetzell (taitai fono), Leituala Dr. Ben Matalavea, Su’a Peter Schuster, Namulau’ulu Sami Leota ma Mike McGovern ole World Rugby e faatautaia lele suesuega faapitoa ile faaletonu na tulai mai ile Manu Samoa, i lalo ole taitaiga a Namulauulu Alama Ieremia.
VAEGA AUTU OLE LIPOTI
Malosi / Fitness
Ole tasi lenei o faaletonu na aliali mai ile taalo ale Manu Samoa. Na taunuu tama i Aukilani mo le taaloga ma le All Blacks, aunoa ma le iai ole malosi e tatau mo taaloga faavaomalo.
I lea faaletonu na fesiligia ai le faamaoni o tama ole ‘au e vaaia ma tausisia le malosi e moomia, a’o loma taaloga taua ma Fiti ma Toga.
Ole tele o tama taalo na o mai e le ausia e latou le malosi e tatau ona iai mo taaloga faavaomalo. Na vaaia lea ile taaloga ma le All Blacks lea na’o le 20 minute na malosi ai le Manu Samoa.
Na fesiligia foi le SRU ile faaaogaina ole $154,783 ST, na faaalu ile polokalame ole Smartbase, e sailia ai le malosi o tama taaalo a’o loma taaloga faavaomalo ua mavae atu nei. Oloo fesiligia foi le faaogaina ole tupe e tusa ma le $82,991ST, na faaalu i malaga ale faiaoga, Namulauulu Alama Ieremia, e taamilo ai i Europa, Niu Sila ma Ausetalia, e sailia ni tama lelei mo le Manu Samoa.
E ui ile tele o nei tupe na faaalu ele Iuni Lakapi e tapena ai tama mo taaloga faavaomalo, peitai, e leai ma se isi o tama na taunuu i Aukilani mo le taaloga ma le All Blacks, na saunia, pe maua foi le malosi talafeagai e taalo ai mo taaloga faavaomalo.
Faiaoga ole ‘Au
E tele suiga o faiaoga fesoasoani ale Manu Samoa. E lei fesoasoani lea ile paleni ole ‘au. Ole tele o ia faiaoga na aumai mai Niu Sila, peitai, e lei umi se taimi na auai mai ai ae toe oese. Ole faigata o lea tulaga, ona e le mafai ona aoina ni gaioiga mautu e taalo ai le ‘au.
O le sui soo foi o faiaoga lagolago, e le maua ai se tonu sa’o o metotia e faaaoga e tama i luga ole malae, ona ole fesuisuiai soo, aua e sau lava le faiaoga lagolago ia ma ana metotia fou, ma ua le mautu ai se ituaiga taalo e tatau ona faaaoga e tama i luga ole malae.
Tele o Tama taaalo na faamaamulu
Fai mai le ripoti na toatele tama taaalo na o ese ma le malaga ale Manu Samoa i Niu Sila, Toga ma Samoa e aunoa ma le iloa ele faiaoga. E foliga na malaga mai latou i Niu Sila ma Samoa e tafao, a fia o ese lava ua oe ese. E to’a 5 lelei tama taaalo na faia lea tulaga. E le’i lelei lea mo tapenaga ale ‘au a’o loma taaloga taua ma Fiti ma Tonga.
Pikiina ole ‘Au
O le ‘au na filifilia na’o le faiaoga lava na faia le filifiliga. E lei iai se fautuaga mai le SRU i tama na pikiina mo le ‘au. E ui na iai le vaega i totonu ole SRU na faaleoleo e fautuaina le faiaoga ile filifilia ole ‘au, peitai e lei faaaogāina i latou nei, ae na’o le faiaoga lava na faia toatasi le filifiliga ole ‘au.
Mo le agai i luma, ua faatuina nei le galulue faatasi ole faiaoga ma le Laulau Faufautua ale SRU mo le pikiina ole ‘au ale Manu Samoa.
Tala ole Tupe
Na faatupeina ele SRU mea uma lava mo le Manu Samoa, e aofia ai le totogi o ana faiaoga e toatele, ma malaga ale faiaoga e asiasi i tama taaalo.
Mo le lua tausaga 2016/17 na inivesi ele World Rugby le $2,571,111 ($2.5 miliona) ile polokalame atina’e ole High Performance Unit (HPU). Faaopoopo iai ma le $1.6miliona ale SRU na faaaoga i lea polokalame.
Ae na faailoa ile ripoti e $1.5 miliona ole seleni ale World Rugby na alu ile totogi ole faiaoga ma le au faigaluega ale HPU e to’a ono. O lona uiga ole 80% ole tupe ale World Rugby na faaleoleo mo le atina’eaina ole Manu Samoa na totogi ai le faiaoga ma tagata faigaluega ale HPU.
Na faaalia foi ile lipoti le faigata ona maua o ni kamupani e lagolagoina le Manu Samoa ile 2016-2017.
Atina’e mo le Agai i Luma
Na mauaina ele Laulau le lelei o nisi o vaega ole ‘au oloo iai nei, ae maise ai tama fou mai le galuega ole lua tausaga ua mavae. Ae e iai tama tuai ole ‘au e ao ona faamavae loa ae tuu le avanoa i tama fou. E iai foi ma nisi na faaaogaina ele Manu ae e lei toe filifilia ona e lei ausia le tulaga na faatonuina ele faiaoga. Na fesiligia ele Komiti / Laulau le loto nu’u o nisi o tama ole ‘au, ma le faaaogaina o malaga ale Manu Samoa mo a latou lava feuiaiga. Na ripotia foi le taumafa ava malosi o nisi o tama ole ‘au ile fale talimalo na nonofo ai. Na mataina foi ma le fesiligia ole malosi ole pule ale Faiaoga ma le Taitai Malaga ile taupulea o tama ma a latou feoaiga.
Na fesiligia foi ele Komiti Suesue le lotonuu o nisi o tama ole ‘au, ona o lo latou faaaogaina ole Manu Samoa o se auala e malaga mai ai e pei o se tafaoga, na lipotia foi le tagofia ole ava malosi e tama ole ‘au, a’o nonofo ai i faletalimalo sa api ai le ‘au. O ia itu ua fesiligia ai le galuega ale Faiaoga ma le Taitai Malaga, ile puleaina lea ole ‘au ma amio a tama taaalo, e peiseai, na vaivai tele le Faiaoga ma le Taitai Malaga ile itu lea.
Tuufaatasiga
E le’i taofiofia ele SRU se mea na moomia ele ‘au, na tuuina atu ele SRU mea uma sa moomia mo le tapenaina ole Manu Samoa mo ana taaloga.
E tele se faaletonu ile malosi o tama taaalo ile taimi na taunuu ai i Aukilani mo le taaloga muamua ale Manu Samoa ma le All Blacks.
Fesiligia le lotonuu o tama ole ‘au e tauivi ai mo le ‘Ofu ole Manu Samoa’. Ua leai se agaga e mitamita ai ile avea o ia ma tama ole Manu Samoa.
E iai tulaga lelei, e ala lea ile atinaeina o tama fou mo le Manu Samoa.
Fautuaga
O le fesili autu, pe ole a tauave ele faiaoga oloo iai nei le ‘au mo le isi tausaga ma agai atu ai ile Rugby World Cup i Iapani.
E ao ona iai se suiga o amio tu ma aga ale ‘au e amata atu ile faiaoga.
Ole faiaoga e tauaveina le ‘au i luma, e ao ona galulue faatasi ma le SRU ma le World Rugby ae e le fai toatasi e ia filifiliga ma faaiuga uma mo le ‘au.
O tama na oese ma le malaga ale Manu Samoa e ao ona fai iai se faaiuga talafeagai.
