O se fetauiga mataina tele lenei taaloga i le taamilosaga lakapi mo le Pacific Nation Rugby Cup lea na taaalo ai Samoa-A ma le Crusader Knights i le malae taalo Alpine Energy i Timaru i le Aso Lulu, aso 9 o Mati, ina ua sifi ese mai Lincoln Kalaiesetete ona o loo afaina lea malae i le mafuie.
Na matuā matagofie ma malosi le o mai a le au lakapi a Samoa i le ‘afa muamua, lelei le latou faasoasoaina o le polo, malosi le sikalamu, peitai na muamua sala Samoa ina ua 13 minute talu ona amata, ona sosoo lea ma le sala a Knights, a‘a e Warren (kapeteni) le polo lea ma tutusa ai le sikoa 3-3.
O le alii o Maselino Paulino (No 5), sa maitauina le manaia o lana taalo ma le lasi o nai ana breaks sa fai, aemaise le taufai finauina e le au atoa, faapea foi ma le ‘afa, Morgan Salesa, na iu lava ina sikoa Maselino.
Ua tau ila le au a Knights i metotia a Samoa, aemaise o le malosi o le unai a le forwards, ma toe sikoa ai le No 3, Leilua i le ‘afa muamua, tulai mai le sikoa 18-10 (Samoa).
Peitai ina ua amata le ‘afa lona lua, ua suia laititi le o mai a le Knights, lē mailoa poo le ā se faamalosi a le coach ia Matt Sexton na oomi i ai, ma sikoa ai Smith. E lei ova le kiki a le alii o Taylor (atalii o Warwick Taylor se sui muamua o le All Blacks).
Se tasi o matatia na ausia i lea afiafi, o le kiki (drop goal) mai tua o le ‘afa o le malae 60-mita a le alii No 15 Titi Esau, na matuā taufai pati ai le aumaimoa ma tulai mai le sikoa 21-15 (Samoa), ae ua lalata lava ina uma le taaloga.
Peitai e toe 3 minute o totoe ae sala loa Samoa, na faapea foi ona sin bin ma le No 1 a Samoa, ma ua toe 14 nei tama ae o le a uma lava le taimi. E ui i lea na faafuasei ona sikoa le hooker o Smith tulai mai ai le sikoa i le 21-20 (Samoa), ae o le taimi lea ua leai se pisaō o le malae. Na faatalitali uma i le aaina o le polo pe ova mai le 22 mita sideline, ae na matuā pōpō mālie e Taylor lea kiki, fafao lelei i le ogatotonu o pou, manumalo ai loa le Knights i le 21-22.
Na faaalia mai e le alii faiaoga, Fepuleai Selefuti i sui o le Samoa Times lona matuā fiafia tele i le taaloga e ui ina malolo, e faafetai foi i alo o le atunuu i le toe suia mai o le latou taalo, aemaise le lotonuu pe a fuafua atu i le latou fetauiga ma Ueligitone lea na 33-0.
Na ia saunoa foi o nisi o tulaga toe tilotilo i ai o le faaleleia o break downs ona o i na tele ai a latou sala ma pagatia. Faaalia mai foi le lē atoatoa o le malosi (energy) o tama ona o suiga o taumafa, na o araisa ae faaleai se talo.
Saunoa Fuimaono, o loo lelei mea uma pau lava o le discipline ma le faiga filifiliga (decision making) ia toe afua ma fuafua lelei i taimi e lukaluka ai le tai. Na ia momoli foi le faafetai i le tapuaiga a susuga i le faafeagaiga ma le faletua EFKS Timaru, Paiaaua ma Tumanu, faapea susuga Patini Waterhouse ma Leonie (EFKS Shirley) aemaise le mamalu o le atunuu na maimoaina le taaloga.
O se tauafiafi matagofie i le goto mālie ane o le la i le 6pm sa amata ai le taaloga, ma o nai seleni uma na maua i le ulufale na foaiina lea mo Kalaiesetete ma mafatiaga e pei ona iai.
E avatu ai le faamalo i tamafanau a le atunuu, malo le taalo tausala ma ia manuia le alo atu i le faaiuga o le taamilosaga.
