“O lea na tatou faalogo i le saunoaga mai le alii pule, o se galuega na faaaogā ai le uelo, e ta‘u loa le uelo o lona uiga o le afi”. “O le faatamala lava e lē mafai ona alofia tusa lava poo ā ni tapenaga lelei e iai lava ma le faatamala,” o se finagalo lea o le Palemia na faaalia i le feiloaiga masani ma nisi o tusitala i lana faatalatalanoaga masani i vaiaso taitasi i luga o le leitio.
O le faatoa faaalia lea o se finagalo o le taitai o le Malo o ia foi o le taitaifono o le Komiti o tapenaga i taimi o faalavelave faafuasei, le tofa Auelua Fatialofa Lupesoliai Tuilaepa Sailele Malielegaoi, i le tuanai o le faalavelave na mu ai se tasi o tane suauu kiso o loo i luga o le uafu tele i Matautu i Apia.
O le Aso Gafua na tea nei na tulai mai ai lea faalavelave na matuā gatete ai lagona o le toatele o loo galulue i soo se ofisa o le Malo i le taulaga o Apia faapea pisinisi o loo iai.
“E lē o mafai ona iloa le mafuaaga o le mu ona e faatali i se lipoti o suesuega ua faia i le taimi nei, ae ou te ioe sa fai le galuega a nisi o le matou kamupani o le ueloina o rails o le auala sitepu e alu i luga o le tane,” o le tali mai lea o le pule o le PPS o loo aumaia suauu i le atunuu ma faapea ona faatau atu i auaunaga o loo manaomia ai lea oloa i vaega eseese o le atunuu, le susuga Samau Sefo Etuale.
Na faaalia e Samau o le mae‘a ona faia o le galuega lava lea i isi tane suauu ona faasolo atu lea i le tane lona tolu lea na tulai mai ai le mu. Sa ia faaalia o le saogalemu o tane e maualuga ona o le ituaiga o uamea o loo fausia ai tane e lē mafai ona pa pe a mu.
O le itu foi i paipa o loo tatanu i lalo o le palapala i le loloto e tusa ma le ono futu e lē mafai ona pāpā pe a tupu se mu, ona ua mae‘a ona fausia ki e loka ai vaega eseese o fesootaiga o paipa ma e lē tuua foi se suauu i totonu o paipa ona o le taimi lava e mae‘a ai ona pamu ese le suauu e mautinoa ua leai se mea e tasi o toe totoe ai.
E toalua ni tagata popoto faapitoa i suesuega o mu tau suauu o loo auai i le suesuega o loo faia.
O le taunuuga o lea suesuega o le a faatoa iloa tonu ai le pogai o le mu, ma iloa ai foi poo ā tonu ni itu na faaletonu na mafua ai ona tupu le faalavelave.
Na talanoa nisi ma faaalia o latou lagona popole pe ana tupu se mu tele e mafua mai i le tane suauu na aafia. O ia popolega ua aliali mai ai le tele o fesili i vaega ua tatau ona silasila i ai le Malo e tatau ona faaleleia ina ne‘i toe tupu mai se mu matautia faapea i le taulaga.
O le auaunaga a le fuimu o le isi lea vaega ua tatau ona faaleleia i le tatau ona iai ni mea faigaluega talafeagai ma ia iai ma ni loli fuimu e mafai ona faatinoina le galuega o le fana atu o le pauta e titina ai mu tau suauu mai se nofoaga e mamao e lē lamatia ai le soifua o le au fuimu. Pe ana lē agai ane le loli fuimu mai le malaevaalele e iai vaega ia e lē mafai ona faatino lea gaioiga lea na mafai ona mate ai le mu.
Faaalia e le Komesina o le fuimu o vaega uma ia o le a tuuina atu i le lipoti i le Malo e silasila i ai. O apefa‘i uumi e mafai ona fui ai fale tetele i le taulaga o nisi ia o vaega sa faailoa i le Komesina pe o lava tapena i ai.
Peitai sa faigata ona ia faaalia pe o iai ia vaega ona o le taulaga o Apia ua tele fale tetele e maualuluga e ao ona tapena lelei i ai le latou tautua. E lē o iloa se aso e mae‘a ai le suesuega ma tuuina atu loa le lipoti i le Malo.
E ui e toatasi na maliu i le mu o le tane suauu ma le toatasi na manu‘a lea ua faasolosolo manuia ae o se tasi lea o faalavelave tau mu ua faalogoina ai le tele o faitioga mai nisi o le atunuu.
