Ua faitau masina o faatali le afioga i le Komesina o Leoleo i se tala lata mai pe tumau i lona tofiga pe o le a sui atu se tasi na te tauave le galuega o le faauluulu i ai o galuega faaleoleo i totonu o Samoa.
Faaalia e Lilomaiava Fou Taioalo, e matuā leai lava se tala ua oo atu ia te ia e faatatau i lenei suesuega o loo faia e le Komisi Suesue e faatatau i faaseā ua oo atu faasaga i le Ofisa o Leoleo.
O le masina o Aukuso o le tausaga na tea nei lea na faamalolo lē tumau ai le afioga Lilomaiava atoa ai ma le tasi o ana Komesina Lagolago, ia Salā Uili Seana ona o le suesuega lea na tofia se komisi suesue tutoatasi e faatautaia.
O Salā Uili Seana sa pulea le falepuipui i Tafaigata ma o ia lea sa tele i ai faitioga i le faatautaiga o le pulega o le falepuipui. Na faamalolo nei taitai o le Matagaluega ae o loo maua lava o la totogi.
O lea ua faalauiloa ma faasalalau le tofiga o le Komesina o le Falepuipui a o sauni ai le Malo i le tuueseeseina o le Matagaluega o Leoleo ma se matagaluega fou o le a tutoatasi ai lava le vaaiga o toese i totonu o le atunuu. Ua agai i fafo ia faasalalauga ma ua laga ai foi faaseā a nisi faapea o le ave i fafo o nei avanoa ae lē tau lava o Samoa e faasalalalu ai.
O le faamatalaga a le alii Palemia, o lea ua aumai le tali ma le lipoti a le Komisi e faatatau i suesuega na fai, ae o le fautuaga e tuu atu se isi masina atoa e iloilo ai ma fai ai se faaiuga a le komisi e faatatau i tofiga nei e lua ua taatia pea i le taimi lenei.
O le mau a Lilomaiava ua tele masina o faatali ma e na o le manao lava e ta‘u atu ia poo le ā se iuga ae ua ese lenei suesuega ua matuā leai lava se sao atu i fafo o faaiuga a le komisi. O lea ua faalauiloa le finagalo o le Komisi e faatatau i suiga e tatau ona faia ina ia saga faaleleia ai le auaunaga faaleoleo.
O le laualuga o le latou lipioti o le manaoga lea mo suesuega e faatautaia i totonu o le matagaluega (internal investigations) ina ia vave ona faatino, ae aua ne‘i tuutuu umi auā e tele ai masalosaloga i auala ua faatino ai ia suesuega.
O le mau a le alii Palemia e lei faia lava se iuga i le taimi lenei i le tofiga o le alii Komesina ma le Komesina lagolago ae ua aogā foi lenei suesuega ua alia‘e ai auala e tatau ona faatino auā le faaleleia atili o lenei foi tautua faigata.
