E lē o toe solomuli le faatinoga o suesuega i tuua‘iga faasaga i leoleo e toafā ua faamalolo lē tumau ae faatali le taunuuga o ni moliaga o le a tutulai ai i le faamasinoga.
O le amataga o le vaiaso nei na valaau ai moliaga o le gaoi a o avea ma tagata faigaluega faasaga i se alii leoleo sinia o loo umia le tulaga faaleoleo o le Suprintendent, le susuga Tagaolo Iosefatu Wright. O loo tulai mo le alii leoleo le susuga i le loia le afioga Leota Raymond Schuster.
O le talosaga a le tamaitai loia mo le itu a leoleo o Precious Chang e manaomia se taimi e faamae‘a ai suesuega a leoleo ma faamautu moliaga faaiu ua talia e le Afioga i le Faamasino Sili, Patu Tiavaasue Falefatu Sapolu.
O le aso 18 o le masina Me 2015, le Aso Gafua o le vaiaso fou o le a toe valaau ai lenei mataupu, e tatau ona oo atu i ai ua mae‘a moliaga a leoleo ma le faamoemoe o le a tuuina atu ai ma se tali a lē o loo molia.
E iai le talitonuga e faavae i ni molimau mai totonu o le ofisa o leoleo, o moliaga o le alii leoleo sinia e fesootai ma ni tuua‘iga o le toesea o suauu kiso sa faaaogā mo le vaaleoleo o le Nafanua. O Tagaoloa sa galue i le ofisa o vaaleoleo ae o le amataga o le tausaga nei 2015, na faasee ane ai ma galue i le ofisa autu o leoleo i Apia.
O le Aso Lua 5 o Me 2015 na valaauina ai foi moliaga o nisi leoleo sinia o loo faamalolo lē tumau. O le alii leoleo o loo umia le tulaga faaleoleo o le Satini o Sione Melefata, ma le leoleo satini sinia o Liliolelagi Lafi Matautia. O Sione sa faauluulu i ai le ofisa fou o leoleo i Lotofaga Safata, a o Liliolelagi Lafi sa galue i le vaaleoleo o le Nafanua.
O le aso 19 o Me 2015 o le a toe valaauina ai faamasinoga o ia Malu o le Malo ona o loo tau faamae‘a suesuega a leoleo ma faamautinoa ai moliaga faaiu.
O le lua vaiaso muamua talu ona amata galue le Komesina fou o le Matagaluega o Leoleo le susuga Egon Keil, na faia ai lana faaiuga e faamalolo ni leoleo se toafā lea e aofia ai ma se tamaitai leoleo sa galue i le ofisa o leoleo i Safata.
