O se faaiuga a le Kapeneta na aveese ai nisi o asosi o taaloga mai i le faaaogāina o nisi o fale taalo ma malae taalo, ua lua tausaga e lei toe suia ma ua faafaigata ai le toe foi o nei asosi i le faaaogāina o nei nofoaga.
O le fono i le vaiaso fou a le Komiti Faatonu e Pulea Malae Taalo ma Fale Taalo i totonu o le atunuu o le a maua ai le faaiuga pe toe tatala fale taalo ma malae taalo nei i Asosi o Taaloga eseese i totonu o Samoa.
O le tausaga na tea nei na faatonuina ai le tele o asosi o taaloga e agai ese ona o tapenaga ma galuega toe faaleleia na faia mo malae taalo nei ae o fale taalo foi i Tuanaimato. Na mae‘a le fono tele a malo laiti tauatiae a le Pasefika, sosoo ai ma le fono o le Komisi o le Tuna, agai mai ai ma le taligamalo tele lenei a Tupulaga Talavou o le Pasefika, ae o loo tapunia lava le tele o nei fale taalo.
O autafa o fale taalo tetele ua agai i ai nisi o nei Faalapotopotoga mo a latou toleniga auā lava a latou taaloga ma tausinioga o loo faagasolo.
O le faafitauli, ua iai taamilosaga faavaomalo ua fia agai ai nei asosi e pei o le asosi o siisii uamea mamafa, ua matuā manaomia ai lava fale taalo na fai ai a latou tapenaga i tausaga ua mavae, ae o lea lava e lē o maua se avanoa.
O le faaiuga lea na faia e le Kapeneta ae e lei oo mai fono faavaomalo e pei ona ta‘ua ma taaloga tetele faatoa mae‘a atu nei ae o lenei lava e lei toe faaaogāina.
O le vaiaso lenei ua tusi atu ai le Asosi o le Siisii Uamea Mamafa i le Alii Palemia mo se fesoasoani ona o lea ua faigata tele ona mae‘ae‘a a latou sauniuniga mo taaloga faavaomalo o loo alo atu i ai ona o le leai o se nofoaga lelei mo a latou tapenaga. Faaalia e Tuaopepe Jerry Wallwork, e lē mafai ona toe fai mai se faamatalaga se‘i faatali se tali mai i le Palemia.
O le tulaga foi lena i tapenaga ma toleniga a le autaaalo o le hockey e pei ona talosagaina ai le tatala o le nofoaga sa fai ai toleniga a lenei ‘au mo a latou foi taumafaiga aemaise o le atinae ai o lenei taaloga.
Faaalia e Faamausili Taiva Ah Young o le asosi hockey e lē mafai ona maualuga le atinae o taaloga pe a leai se fesoasoani i nofoaga e faatino ai taaloga ma o le mafuaaga lea o le talosaga i le pulega o fale ma malae taalo ina ia fesoasoani e tatala atu le malae hockey i Tuanaimato mo a latou taaloga.
Faaalia e le Ofisa Sili o Malae Taalo ma Fale Taalo o Samoa ia Moefaauo Salale Moananu, o lea ua iai le manaoga o isi autaaalo a le atunuu e pei o le aau ma le au faataavale polo mo nofoaga lava nei ma ua tuu atu nei i le fono a le Komiti Faatonu o ia nofoaga se faaiuga e tatau ona aumai i le Aso Lua o le vaiaso fou.
