Oloo faatali le faamaonia ole uluai Pine a Samoa ile Olimipeka. E auala mai lea ia Ele Opeloge, le tamaitai siisii uamea mamafa a Samoa ile Olimipeka ole 2008 i Saina lea na tu fā ai o ia ile faaiuga ole tauvaga ole 75 kilokalama le mamafa.
O tamaitai sa tu tolu ma tu lua ilea tauvaga sa o la maua le pine Siliva male Apamemea, ua faamaonia lo la solitulafono ile faaaogāina o fualaau faasāina. Oloo faatali nei la le matuai faamaonia o ia suesuega ale Komiti ale Olimipeka (IOC) ona faalauiloa ai loa lea ole maua e Ele ole Pine Siliva.
E na ole tasi le kilokalama na va ai le sii a Ele male sii a lē na tu tolu. Afai e taunuu faasalaga masani o faaiuga ale Olimipeka, o lona uiga e see Ele ile tu lua, ae see Maryam Usman mai Nigeria lea na tu lima ile tu tolu mole Apa Memea. Ae ole manumalo, o Miran JANG o Korea e 326 lana sii oloo tumau pea. E fā kilokalama na va ai Ele ma Maryam (265 kilokalama) o Nigeria.
Afai loa la e taunuu le faaea ma faa‘ula Ele ile Pine Siliva, o lona uiga o ia ole a avea ma tagata taalo muamua mai Samoa ua manumalo ise pine ale Olimipeka.
A‘o ia tulaga male umi o fai suesuega ale IOC, e lē ose mea lelei lea ile talitonuga ole afioga ia Tuaopepe Jerry Wallwork, oloo faauluulu iai le Samoa Weightlifting.
“E lē ose mea lelei le umi ona faatali o faaiuga o suesuega. E matuā umi tele le valu tausaga. Ua sola ese foi male maualuga ole tulaga ole maua o ia pine ona ole vavamamao ole taamilosaga ile 2008 male taimi nei. E valu tausaga, pe aisea?”
E ui i lea, ose tala fiafia mo Ele ma ole a tapena foi se faauuga lelei mo ia pe a mae‘a suesuega ale IOC. E lē gata i lea, ole taalo faamaoni o Ele ole a amanaia lea pe a faaula o ia ile pine siliva.”
Na ta‘ua foi e Tuaopepe, ole a faatali le faaiuga ale IOC masalo e tasi ile lua vaiaso ona maua loa lea o faaiuga. E 11 le aofai o tagata siisii mai le Olimipeka ole 2008 ua faamaonia le faaaogāina o fualaau faasāina, oloo faatali uma lava o latou faaiuga.
E tolu pine auro a Saina ile siisii uamea mamafa a tamaitai oloo aafia ai, o Cao Lei, Liu Chunhong ma Chen Xiexia. Ole isi toavalu o Khadzhimurat Akkaev ma Smitry Lapikov o Rusia, Anastasia Novikova o Belarus, o Irina Nekrasova o Kazakhstan, Azerbaijan ma Natalya Davydova o Ukraine.
E na ole toalua na tauva ile 75 kilokalama lea na sii ai Ele oloo aafia, ae o isi na tauva ile 85 kilokalama.
Ile lipoti ale International Weightlifting Federation (IWF), na ta‘ua ai ole toasefulu male tasi lea ua maua ile faaaogāina o fualaau ma vailaau eseese ua tuai ona faalauiloa, ona ole suesuega faalua (re-tests) lea na maua ai i latou nei e to‘a 11.
Ole toatolu mai Saina na maua ile faaaogāina ole fualaau ole GHRP-2, le anabolic steroid male sibutramine. O fualaau nei e
faatupu ai tino o tamaloloa. E lē na ole ‘au pine foi ua faamaonia lo latou solitulafono, na maua foi ma isi e lei maua ni tulaga.
Ile faamaonia ai ole pine Siliva mo Ele, ole a faaopoopo lea i lana pine auro na maua ile Commonwealth Games i Initia (Delhi, 2010). Na tu ono o ia ile Olimipeka i Lonetona ile 2012.
Faaiuga ole Taamilosaga ole Olimipeka 2008 (Saina) Siisii Uamea Mamafa Tamaitai
75 kilokalama
Pine Auro – Miran JANG (Korea) aofai: 326 kilokalama
Pine Siliva – Olha KOROBKA (Ukraine) aofai: 277 kilokalama
Pine Apamemea – Mariya GRABOVETSKAYA (Kazakhistan) aofai: 270 kilokalama
Tu 4 – Ele OPELOGE (Samoa) aofai: 269 kilokalama
Tu 5 – Maryam USMAN (Nigeria) aofai: 265 kilokalama
Faatulagaina o pine fou
Pine Auro – Miran JANG (Korea) aofai: 326 kilokalama
Pine Siliva – Ele OPELOGE (Samoa) aofai: 269 kilokalama
Pine Apamemea – Maryam USMAN (Nigeria) aofai: 265 kilokalama
