“E tāua tapenaga o le lotoifale a o lei sainia le feagaiga”…Faaolo Utumapu
O le vaiaso nei ua faatāua ai i Samoa ma le lalolagi atoa le aso mo tagata e logonoa poo i latou e tutuli e faaletonu le faalogo.
O le SENESE o se aoga lea i lo tatou atunuu ua aooga ai fanau e iai manaoga faapitoa e faasino i le logonoa.
O lo latou aiā tatau e maua ai manaoga uma faapei o tagata e atoatoa le malosi o le tino ma le mafaufau e le o se tulaga e faigofie ona ausia ma o le mafuaaga lea o le apo e le SENESE o polokalame e faia i aso faamanatu i tausaga uma mo i latou e logonoa, ina ia mafai ona momoli atu ai le fe‘au i lo tatou atunuu i le tāua o le malamalama ma le silafia i manaoga o tagata e iai lea manaoga faapitoa.
“O le autu lea o le matou polokalame faalauiloa na amata i le tausaga e 2010 ona o le matou vaai e lei telē se silafia o le tatou atunuu”, o le saunoaga lea a le susuga Petaia I‘amafana, le faauluuluga o le polokalame mo tagata logonoa i Samoa i lalo o le vaavaaiga ma le pulega a le SENESE i se feiloaiga ma tusitala na faalauiloa ai le faamoemoe o lenei tausaga e pei ona faagasolo i lenei vaiaso i lo tatou atunuu.
O faleaiga ua filifilia sa auai i le polokalame i le tausaga ua mavae, ua latou faaaogā nisi o faailoga o le gagana faitaga le sign language e faatino ai le latou auaunaga i le atunuu, aemaise foi le atunuu e autovaa i ia faleaiga mo ni taumafataga o le a faaaogā ia vaega o le gagana faitaga e fesootai ai mo le otaina o a latou taumafa.
O se faiga e faatāua ai le silafia o manaoga faapitoa o i latou e logonoa ma amanaia ai a latou aiā tatau i le tatau ona tutusa o auaunaga uma mo tagata e atoatoa le malosi o le tino ma le mafaufau ma tagata e iai manaoga faapitoa e pei oi latou e logonoa.
“O le feagaiga faavaomalo e faatāua ai aiā tatau o tagata e iai manaoga faapitoa, o loo faatalitali i le taimi e sainilima ai Samoa”, o le faamatalaga lea a le susuga Petaia. “O le tāua o le feagaiga ona o le a amanaia ai o latou aia tatau”.
O le fesili pe aisea ua tuai ai ona saini Samoa, na tali i ai le tamaitai ofisa sinia o le SENESE e po lana vaai le tamaitai o Faaolo Utumapu, “O le itu tāua lava i tapenaga a le Malo i le feagaiga lenei o le tapena muamua o le lotoifale o Samoa, auā e leai foi se mea e topetope ai ona saini ae leai ni tulafono e faamalosia ai”.
Na faaalia lava e Faaolo o le masina nei o le a sainia ai le feagaiga, ma o le talitonuga o lo fono o loo usuia nei a Malo Aufaatasi i Niu Ioka o le a sainia ai loa e Samoa le feagaiga.
“Sa tuu e saini i le taimi o le fono a atunuu laiti le SIDS, ae sa toe taatia se‘i faamae‘a nisi o tapenaga ona faatino ai lea o le sainiga i le fono a Malo Aufaatasi i le masina nei”, na saunoa ai Faaolo.
O le faamoemoe o le vaiaso nei o le a lē gata ina faalauiloa ma faatāua ai i latou e logonoa, ae o taumafa uma e faatau e faleaiga ua lautogia, o le a maua ai se seleni e fesoasoani i polokalame mo le a‘oa‘oina atili o fanau e logonoa, o se manaoga faapitoa o loo faatāua e le aoga o le SENESE.
