Ua mae‘a le tolu tausaga muamua o Komesina lagolago sa filifilia mo ia tulaga tofi maualuluga e lagolago i le pitolaau ma tiute tauave o le Komesina o le Matagaluega o Leoleo ma Falepuipui, ma ua faatalitali nei pe toe filifilia mo le isi tai tolu tausaga o konekarate.
O le toafā sa filifilia e aofia ai le tofa Pagamalie Penani Lemuelu, ua lē toe talosaga ona ua oo i le matua o le soifua ua tatau ai ona malolo litaea ma ua mae‘a foi tausaga na faaopoopo i lana tautua.
O le afioga Leaupepe Fatu Pula, le susuga Leiataua Aviga Salale, ma le afioga Seaga Uili Lafaele. E na o le toatolu ua toe talosaga faaopoopo i ai ma le isi to‘a sefulufitu faatoa talosaga i ia tofiga ma sa feagai ma faatalatalanoaga poo interviews i le vaiaso na tea nei.
O le toasefulufitu foi lea ua aofia ai ma nisi sa talosaga ma faatalatalanoa i le avanoa o le Komesina o le matagaluega lea na faia le faaiuga i le tausaga ua mavae ma toe filifilia ai le afioga Lilomaiava Fou Taioalo lea ua lua nei ana nofoaiga ta‘i tolu tausaga i le tofiga o le faauluuluga o le matagaluega.
O i latou uma na talosaga ma faatalatalanoa o loo umia le tulaga poo le rank o le Superenetene (superintendent) e aofia ai ma se tamaitai leoleo e toatasi.
Faaalia e se molimau faatuatuaina e faigata le filifiliga ona e agavaa uma i latou na talosaga, peitai o le faaiuga lava e autasi i ai le laulau na faatalanoaina le avanoa o le filifiliga lea e tatau ona talia e i latou uma na talosaga.
O avanoa foi nei e faakonekarate e lē mafai ona toe apiliina pe talosaga se tasi e pei o isi tofiga o galuega a le Malo e mafai ona apili pe mafai ona toe fesiligia se faaiuga e tofia ai se tasi.
O le taimi muamua lenei o le a atoa ai le toalima o Komesina lagolago e pei ona aiaia i le tulafono a leoleo e faasino i le
filifilia o ia tofiga.
Na faaalia e le sui sooupu o le matagaluega o le isi o komesina lagolago o le a tofia na te vaaia le galuega a le Malu o le Malo i Savaii ma e faamautu i le ofisa o leoleo i Tuasivi. Talu ona amata faatino le suiga i le filifilia o Komesina lagolago e na o le toafā sa filifilia, ae o le tausaga nei o le a toalima.
O le isi Komesina lagolago o le a ia pulea le falepuipui i Tafaigata, ae o le isi toatolu o le a galulue ma le Komesina o leoleo i le ofisa autū o le Matagaluega i Apia. O le soloia o le tulaga Sui Komesina poo le Deputy Commissioner of Police, na suia ai loa i Komesina lagolago ma o taimi e toesea ai le faauluuluga o le matagaluega pe gasegase foi, e tofia ai se tasi o Komesina lagolago e tauaveina ona tiute, ma o le amataga o nei tofiga sa auai i latou i lea tulaga.
