O le saunoaga lea a le Afioga i le Faamasino ia Vui Clarence Nelson i le fofogaina o se faaiuga o le faamasinoga o se tamā e 47 tausaga ina ua ia ioeina i luma o le Faamasinoga Maualuga ona moliaga o le faaoolima matagā ma le taumafai e faia ni faiga aiga i lana fanau teine.
I tolaulauga a le itu a Leoleo na ta‘ua ai e toatolu alo teine a lenei tamā o loo aafia i lea soligatulafono ma o le tamaitai matua o se alo teine moni o lē ua molia ma e faa 55 ona faatino e lenei tamā ni faiga aiga fai faamalosi i lona afafine lenei i le tausaga e 2007 a o 21 tausaga le matua o lea tamaitai.
O teineiti laiti e toalua o loo aafia foi, o le fanaufai a lea tamā i lona toalua faapouliuli ma e 17 tausaga le matua o le isi, ae e i lalo ifo o le 16 tausaga le matua o le isi teineititi, ma na faatino e lea taulealea nei faiga lē alofa i le masina o Iuni o le tausaga nei.
I le tulai mai ai pea o nei ituaiga soligatulafono, na saunoa ai le Afioga ia Vui o le faasalaga maualuga o le faaoolima matagā i fanau teine e lē silia ma le fitu tausaga i le falepuipui ma o se tulafono ua tatau ona toe iloilo.
“E matuia lea soligatulafono ma e lē taliaina i le tatou aganuu, o lea ua lē talafeagai ai le fitu tausaga o le faasalaga maualuga, ma ua tatau ona toe iloilo”, o le saunoaga lea a le Afioga ia Vui Clarence Nelson.
Ua ioeina e lea tamā moliaga e 56 o le faia o ni faiga aiga i lona lava afafine moni ma ua tuua e lea tamaitai le atunuu mo Niu Sila, ma na ta‘ua e le Faamasinoga e talitonu ua malaga ese o ia e toe tau amata se isi amataga fou o lona olaga talu ai lea faafitauli na tulai mai.
Na ta‘ua e le loia na tulai mo le itu a Leoleo, o se tasi o taumafaiga a lenei tamā e faatino se faiga aiga ma lona alo teine fai lea e i lalo ifo o le 16 tausaga le matua, na ia fesiligia ai lea teineititi i lona olaga faiuo ma poo ā foi la mea ma lana uo tama e fai, faatasi ai ma lona tauanauina o lea teineititi pe mafai ona ia siakiina le tulaga o lona teine muli.
I luma o le Faamasinoga na faaalia ai e lea tamā, o le teineititi lava lea na faaosoosoina o ia e fai ni feusuaiga peitai o le silasila a le Faamasinoga ua taumafai lea alii e tuua‘i le soligatulafono i le teineititi.
“E lē talia e le Faamasinoga lea tulaga ona ua faaleaga ai le talitonuga i le va o tamā ma afafine ona o i latou e tatau ona puipuia i latou. E lei fanau mai e fai ma meataalo a o latou tamā”, o le toe faaopoopo mai lea a le Afioga ia Vui.
E foliga mai e 20 tausaga e va ai lē ua molia ma le tamaitai muamua na aafia i le taimi na tulai mai ai le soligatulafono ma na faaalia foi i le tolaulauga, e iai nisi o faiga aiga na faatino i le fale o lea tamā ma lona toalua faapouliuli a o iai le tina ma lana fanau faatasi ai ma nisi faiga aiga na faia, ina ua mae‘a ona ia faapogisa lona afafine i le ava malosi ma ia faatino ai loa nei uiga ia te ia.
“Ua faatuputupulaia lea tulaga ma e matuai feteenai lava i tu ma aga o loo tatou ola ai ma e ta‘ua o le mataifale.
O se tulaga faalumaluma ma e faamaulaloina ai foi le tulaga o soo se tagata i totonu o nuu ma aiga, aemaise o se ila e faapipii i olaga o nei fanau teine, ma o le mea lea ua faia e lea tamā i lana fanau”, o le saunoaga lea a Vui.
I le mae‘a ai la o iloiloga a le Faamasinoga i lea mataupu, ua toe faaui ai i tua le isi moliaga o le taumafai lea e fai se faiga aiga i lona afafinefai lea e i lalo ifo o le 16 tausaga le matua ina ua talia e le Faamasinoga le talosaga a le tamaitai loia na tulai mo le itu a Leoleo.
E tele ni itu lelei o lea tamā na faaalia i luma o le Faamasinoga e ala i le lipoti a le Ofisa o le Faanofo Vaavaaia faatasi ai o ia o se tagata faato‘ā molia ma ua ia ioeina ona moliaga ua faasaoina ai le taimi o le Faamasinoga.
Ua tuuina atu nei lea tamā i le toese mo le lima tausaga i lona faia o ni faaoogalima matagā i lona lava afafine, 12 masina i lona taumafai e faia se faiga aiga faamalosi i se tamaitai o lona aiga, ma le isi 12 masina i lona taumafai e faia se faiga aiga faamalosi ma se tamaitai o lona aiga e i lalo ifo o le 16 tausaga le matua. Ua tulai mai ai le ono (6) tausaga le tuuaofai o nei faasalaga ma e tuli eseese.
