Ile fā masina ua savalia nei talu ona tuanai le aveesea o tofi faifeau male tofi failautusi aoao ole Ekalesia Faapotopotoga Kerisiano Samoa sa umia ele susuga Afereti Uili, ua faatali nei o ia pe ole ā se faaiuga ale Komiti Faatonu ale Autoeaina sa faia lea faaiuga ina ua mae‘a nei ona faamamā lona suafa mai ni tuua‘iga ose fesootaiga faaulugalii.
“O lea ua tau saili se galuega e maua ai se tupe ona talu lava ona aveese o‘u tofi ma ua mae‘a ona faamamā lo‘u igoa mai tuua‘iga, e lei toe maua e a‘u se faaaliga mai Toeaina ole ekalesia”. Ole finagalo lea o Afereti ina ua fesiligia ele nusipepa ina ua mae‘a ona tulai le tamaitai o Angie Lesa na faia tuua‘iga ma faamaonia ile faamasinoga le taunuuga ole soalaupulega ua faamamā ai le suafa ole susuga Afereti Samuelu.
“Ou te faafetai ia i latou sa aumai faamafanafanaga ma upu faufautua ma tatalo mo ma‘ua male fanau ona ua tali le Atua”. “Ole mafuaaga lena na ou tuualalo ai i Toeaina e faatali se‘i mae‘a mai le mataupu ile faamasinoga”.
Sa lē mafai ele faamasinoga ona faia se faaiuga ma faamaonia le taunuuga ole soalaupulega poo le mediation na faia ile va o Afereti male tamaitai o Angie ona e faalua ona valaau le mataupu ile faamasinoga maualuga e lē oo atu lava le tamaitai e faia sana tautinoga e faamaonia ai.
Peitai ole amataga ole masina nei o Setema na faatoa mafai ona tulai ai Angie Lesa ma faamaonia le taunuuga ua oo iai le soalaupulega. Ile talanoaga male susuga Afereti na ia faaalia oloo taatia pea ile faamasinoga le isi ana tagi faasaga ile tamaitai o Angie ma nisi ole nusipepa ole Samoa Today lea ua lē o toe iai sana lomiga o toe faia, faasaga ile faaleagaina o lona tagata ile latou lipoti na salalau ai tuua‘iga o fesootaiga faaulugalii.
Faaalia e Afereti e leai sana gaioiga e faia ile faaiuga na aveesea ma faamalolo ai ona lona tofi faifeau male failautusi aoao ae oloo faatali ise finagalo ole Komiti Faatonu ale ekalesia. “E oo lava i lo‘u tofi ekalesia na aveese ae oute iloa ua tatau ona latou maua (Komiti Faatonu) le faaiuga ua iai le mataupu”.
Na tapa se finagalo ole taitaifono aoao ole Ekalesia EFKS le susuga ile Toeaina Tautiaga Senara, peitai na ia fautuaina e saili ile taitaifono ole Komiti Faatonu a le Autoeaina o latou na faia le faaiuga.
“E leai se mea ole a tuai ai se faaiuga pe afai o lena ua aumai se finagalo ole faamasinoga”, na saunoa mai ai le susuga ile taitaifono aoao ole ekalesia.
