Faatalanoaga fesoasoani mo ē fia apalai sitiseni Ausetalia

O le toatele o le mamalu o Samoa e malaga mai Niu Sila ma aumau i Brisbane, e pei ona iai le tulaga fou na suia mai le 2001, e iai nisi e taunuu mai lava ma agai i le Centrelink e fesiligia le certificate pe agavaa ai mo se apalai.
E iai foi nisi e faalēano i sitiseni ma i latou foi e maua lava i le faatuutuu ma le faalēamanaia se‘i vaganā ua tapā le fesoasoani e ala i galuega a le Malo faapea ai le oo atu o fanau i Iunivesite ma i latou e toe faalautele tulaga tau aoaoga mo le apalaiina lea ole HECS e pei ona lau silafia.
E tele lava ina taumafai le tele o mafutaga aemaise nai alo o le atunuu e saili ma aumai ni auala e faafaigofie mo i latou o moomia lea fesoasoani.
O le tofa a Vaaaoao Faamatuainu Alofipo o loo galulue vaavaalua i le faia o worshop ma se tasi o sui mai le Immigration, le susuga ia Marty o ia e i le matagaluega o sitiseni.
O loo faagasolo i vaiaso taitasi, ma ua vaaia le toatele o i latou o loo faatāuaina lea fesoasoani matagofie e ala i le auai atu e faafofoga ma fesiligia le sui mai le Immigration faapea nai tamā ma tina matutua ae faaliliu e le tofa a Vaaaoao Alofipo. O nisi faamatalaga e uiga i sitiseni Ausetalia o loo mafai na agai i le website a le Immigration se‘i vaganā nai tagata e lē mafai na asia lea tulaga lea o loo patino i ai le fesoasoani tāua.
E pei foi o alo ma fanau umia sitiseni Niu Sila tai 16 & 17 tausaga e malaga mai ma aumau iinei,  e leai ni suega e tau  faia na o le interview a pasi ona agavaa lea e fai le sitiseni.
E $260 tala e apalai ai le sitiseni o i latou ua 18 tausaga e oo atu i luga se‘i vaganā ai le au penisione e leai ni suega ae na o le $20.00 le totogi o le apalai, faatasi ma i latou e agavaa i penefiti ma‘i.
O nisi tagata penisione e tusa pe lē sitiseni Ausetalia, e agavaa lava mo sina vaega tupe latou te mauaina a o loo nonofo lava i Ausetalia, ae o le aogā lea o ia faatalanoaga e mautinoa atili ai ma taliina nisi o fesili. Sa saunoa Marty o i latou na malaga mai Niu Sila i luma mai o le masina o Fepuari 2001 o loo faamalosia i latou nei mai Niu Sila ina ia oo atu i le Centrelink e fesiligia (certificate) poo tusi e issue mai pe agavaa mo nofomau ae lelei lava le fesili.
E tele naua vaega e tāpā mai e ao ona atoatoa ai le apalai e pei o ripoti a leoleo (police report) ma isi lava vaega e tatau lava i nai o tatou tagata ia aua le fiu gofie ae saili pea auā e lē mafai ona maua se mea ma se filemu.
O le tele lava o le nofoai ma faatuai, o le siisii foi lena i luga o le tau o le sitiseni ma le nofomau.
Mo i latou e fia auai i le isi workshop o le a faia i le taeao o le Aso Tofi aso 30 o Me amata i le 9am-10am, ma le 6pm-7pm i le  aso lava lea i le hall a le Woodridge State High i le tulimanu o Wembly ma Bardon Road Woodridge.
O le afiafi o le Aso Lua e avanoa ai le tofa ia Vaaaoao Faamatuainu e fesoasoani i le faatumuina o forms e apalai ai sitiseni i le numera 2 Carmody Road i Woodridge ae lelei pe a fesootai atu i le telefoni a Vaaaoao o le 0406 838 942.