Faatalaleleiga o pese ma siva faaleagaga autalavou Ekalesia AOG a Carole Park i le itu Samoa

E ui lava ina saosaoa mai le tele o faafitauli o lenei soifua ma feilafi mai ona tuinanauga, ae a tutu pea le sulu ma faamumū lamepa, e sulugia ai lava le pogisa ma avea ma malamalama ola e tosina i ai agaga e toatele, ae faasilisili ai ona faa‘ino‘inoina o mata i faaosoosoga a le tiapolo.
O le Aso Sa, 28 o Iulai na atofaina faapitoa mo polokalame faaleautalavou a le Ekalesia AOG i le itu Samoa i le pitonuu o Carole Park. O le sini ma le faanaunauga o le auauna a le Atua, susuga ia Ps Tausinioga ma le faletua ia Sauao Tauti, ia faatalaleleiina pea tupulaga talavou i le itu faaleagaga, ae sili ai ona faamalosia ma faamauaa ina ia tetee atu i fiafiaga o le olaga, a ia tumau pea i le Atua ma lana faaolataga.
Sa matuā faatumulia i nisi ekalesia o le Falefitu sa molimauina le faatinoina o pese ma siva faaleagaga, na tofatumoanaina i finagalo le tāua o le sao o tupulaga ma le autalavou.
Sa taitaia lava e le susuga ia Ps Tausinioga Tauti polokalame uma o le faamoemoe, ae o le taitai aoao a le AOG itu Samoa a Ausetalia, susuga ia Ps Tae‘auga Ropati Frost, sa feagai ma se upu folafola mo tupulaga talavou.
O le taitai autalavou a Carole Park AOG o Lutena Mulitalo a o le failautusi o Kaiva Faafeū.