E leai se eseesega ole faataga ona faaaogā loa e tagata i Samoa ole laau faasāina ole maruana ma le faataga loa ole solitulafono ole fasioti tagata.
Ole finagalo lea ole afioga ile Palemia e tali atu ai ile tamaitai loia sinia i Samoa le susuga Unasa Iuni Sapolu ma sona manatu ua tatau ona faataga loa le maruana i Samoa e faaitiitia ai le au nofosala e ave i Tafaigata ma tuuititia ai ma galuega ale faamasinoga.
Faaalia e le Palemia susuga Tuila’epa L Sa’ilele Malielegaoi o manatu e faataga le faaaogāina ole maruana i Samoa, oni manatu e fai e tagata e leaga mafaufau.
O atunuu o loo faataga ai le laau faasāina na faaalia e le Palemia ua iai a latou tulafono e faatonutonu lelei ai le faaaogāina ole maruana mo tagata ua aafia i gasegase e fai si maaleale o aafiaga. Ae i Samoa lava ia e le mafai ona faia ai se tulaga faapea.
Ua tautino foi Tuila’epa o soo se laau ma fualaau faasāina ua faamaonia e tele so latou aafiaga ile soifua saogalemu ma le soifua maloloina ole tagata soifua.
Ole finagalo ole tamaitai loia sinia o Unasa Iuni Sapolu sa ia ta’ua ai ise lipoti a se tasi o nusipepa i Samoa, e iai suesuega a fomai popoto ua faamaonia ai e iai aogā tāua ole maruana ile tagata aemaise o nisi o gasegase. Pe afai e faataga le maruana i Samoa ole a fesoasoani tele lea e faaitiitia ai tupe alu ale Malo ile tele o faamasinoga e tagofia ai solitulafono ole laau faasāina ole maruana.
Ole tasi lea o solitulafono e lē ‘asa se aso ma se masina ona molia ai tagata o lo tatou atunuu auā e le gata ole au molia ile faatau atu ole laau faasāina, ae ole au solitulafono ile totoina ma faafailele le maruana. E faapena foi ona molia nisi i lo latou faaaogā ole laau faasāina e ulaula ai pe a mamago ma taai oni sikaleti.
“O isi aiga ua matuā malepelepe i mea faapenei ma ole taunuuga lena ole tagata ola saoloto”, na saunoa ai le Palemia. “E iai isi atunuu ua latou faatagaina na’o leoleo latou te totō mea ia ona sau sa’o lava lea mai leoleo ave i fale suesue mo le gaosiga o vai faafoma’i ae leai se atunuu ua ou iloa ua faasaoloto le mea lea ole maruana”.
Ole faatagaina ole faaaogā ole maruana ose finauga lenei ua masani ona tatou faalogoina i finauga faapolokiki pe a oo i taimi o faatosina a vaega faaupufai ma ni sui faatutū ose palota e saili ai tofi faipule o Palenene o nisi o atunuu i fafo. I Samoa e lei finauina e se pati faaupufai poo se sui tauva ose palota faapalemene le mataupu ole tatala faasaoloto ole faaaogāina ole laau ole maruana.
