Ose po matagofie ile matuai faatumulia ile mamalu lautele ole atunuu e lē gata o tagata matutua, alo ma fanau a‘o feagai ma tuuaga, ae sili ai tupulaga talavou, lea sa faataunuuina ile nofoaga ale Hosanna Church i Slacks Creek.
O lenei polokalame ale Athletes for life ole aoao mai lea o tagata iloga i soo se taaloga ma faasoa mai o latou foi manatu ma lagona lelei na afua ai ona tini o latou taumafaiga poo i latou foi oloo tamomoe pea ma faaaogā taleni ile taimi nei.
E aogā tele e faamalosiau mo i latou o tamomoe pea i soo se tausinioga ole olaga taalo. Ole faalauiloaina o lea po na lolofi atu lava le toatele o tagata na mafuta atu e fia vaaitino i nisi tagata lauiloa sa auai.
O fofoga ole po na matuai vaaia le mataalia, ole susuga ia Tagoia‘ega Bruce ma lona faletua ia Innez Manū Sione. Na fiafia tagata uma auā sa maimoa ma silasila i nisi sa lei mafuta iai muamua e ala i lenei polokalame manaia na faatautaia ele susuga ia Dominic Feaunati ma si ona faletua ia Pearl Feaunati.
O laua nei male team sa taulamua i lenei faamoemoe. O Dom ma Pearl oloo faagasolo a laua fuafuaga ile faamalosiau lea i alo ma fanau laiti i tulaga tau aiga ile va ma mātua aemaise le community a Logan ma nisi nuu tuaoi o Brisbane aemaise foi le itu tau taaloga.
Ole tele o tagata taaalo, ole auga male naunautaiga lava ole tupe ae oloo fautua malosi tele i laua nei e faatāua le aiga aemaise o paaga, auā poo le ā le naunau ole tagata ile tupe ae iai taimi e moomia ai le fesoasoani a mātua poo le toalua male aiga. O le laua naunautaiga ia paleni itu uma ina ia sologa lelei le olaga taalo ole tamaitiiti ae lei oo atu ina alu ile isi laasaga.
Ole tumutumuga ole la auaunaga oloo ave lo la faatuatuaga ise tasi foi o toa, le susuga ia Tevita Koloi o ia ole founder ole Athletes for Life. Ua faatusaina e i laua Tevita o ia ole laau a‘o laua o lālā, ma oloo paleni lava le faagasologa ole latou galuega e ala ile galulue faatasi.
O tama taaalo iloga ma mautu i lakapi ma nisi taaloga, ole galuega lea a Tevita oloo faamalosiau iai e pei ole susuga ia Karmichael Hunt lea oloo taalo ile Reds male Wallabies Squad lea sa avea ma lauga autu ole po, poo le malo faaaloalogia. E logomālie foi lana faamalosiau i nisi tagata taaalo ina ia auā le fiu gofie ae faamalolosi ma finau.
O Dominic Feaunati na mae‘a lana taaloga na taalo ai ile World Cup mo Ausetalia ini nai tausaga ua tuanai ona faamanuiaina lea i lana konekarate i St Hellens i Enelagi. Ose fiafiaga iai laua male faletua le avea ai i na taimi o Apolo ma Selina Perelini ma o la faufautua.
Na taalo liki Dominic mole 2 tausaga ona toe foi lea ile lakapi iuni ile 4 tausaga. Ole taimi nei oloo avea Dominic Feaunati ma youth worker ma oloo galue faamalosi i aoga (Queensland Pathway College) ma agai atu e asia tamaiti i falepuipui ma faamalosi iai oloo faatali atu i laua e latou te galulue faatasi ma faatumu taimi auā ole leai foi ose mea e faia e faigofie ai ona maua ele fili ma afaina ai.
Na faatalanoa i lea afiafi e Tagoiaega Bruce ma Innez Manu Sione, nisi sa iloga foi o latou taimi i taaloga e pei ole alo o Samoa le susuga ia Sione Faumuina (lakapi liki) e tele foi kalapu na taalo ai i aso ua mavae e pei ona lausilafia ele toatele.
Ole isi tama ole alii o Milton Ngauamo sa taalo ile lakapi iuni, na taalo foi ile taamilosaga ile Super 12 a‘o lei oo mai le Super 15 i aso ua mavae i Niu Sila lea na taaalo i taimi o Jonah Lomu.
E lē gata i lea ole susuga ia Ben Gollings sa taalo mo Enelagi. Ole tamaitai o Sheryl Scanlan ole tuafafine ole alii lakapi lauiloa o Eroni Clarke, sa lauiloa foi ile au Netball a Niu Sila ae o lea ua telē lona sao ile fesoasoani ile Netball a aoga ile taimi nei i Brisbane, sa faatalanoa foi i lea afiafi.
Ua iai le faamoemoe ile matagofie o lea afiafi ole a taumafai le susuga ia Dominic ma Pearl Feaunati ina ia faaauauina pea le aumai o tagata iloga i taaloga e faasoa mai o latou tomai aemaise oni vaega sa tau faavaivai ae na tini lava a latou taumafaiga ina ia unai ma faamalosi ai i tamaiti ma tagata taaalo i lenei vaitaimi aemaise lava le itumalo o Logan.
Na momoli lo laua agaga faafetai ile susuga ile faafeagaiga ia Ps Faamanuia ma le faletua ia Ruta Aloalii (Slacks Creek Hosanna Church) mole nofoaga sa faaaogāina, faafetai foi iai latou uma sa faatalanoaina, aemaise le fofoga ole po Taogiaega Bruce ma Innez Manu Sione, faapea Oriana, June Brown, Faith for Three, aemaise le Core Team, personal Trainer ole Athletes for Life susuga ia Chris Teniseli, faapea Evita Tavita (admin), Leon Mihaere (mentor), faapea i latou uma sa fesoasoani na manuia ai le faamoemoe i lea afiafi.
