Faasoa meaalofa a Saina i tagata Samoa o loo alala i Aukilani

“O lou soifua maloloina ma lou ola maloloina o loo i ou lava aao”, o le saunoaga mulimuli lea a le susuga i le tamaitai fomai ia Kioko i le po o le Aso Tofi ua mavae i le ofisa o le Radio Samoa ina ua mae‘a vaiaso e lima na faagasolo ai se polokalame o le fofo mo i latou e lē o atoatoa le malosi o le tino.

O lenei polokalame o se avanoa lelei mo tatou tagata aemaise lava i tamā ma tina matutua, e aoaoina ai le fofoina o vae ina ia mafai ona toe fegasoloai alatoto o le tino. E faapito lava le faiga o le fofo i lalo o alofivae, auā o le talitonuga a fomai, o vae o loo tauaveina le tino atoa.

Na maitauina i vaiaso nei e lima le agai mai o le atunuu mai le itu i Sisifo aemaise i latou o loo alala i le itu i Saute. O le toatele o nisi o i latou na mafua ona auai i lenei fofo ona sa agai atu nisi o tamā ma tina na auai i le uluai aso ma faataitai i ai, ma latou iloa ai e telē le tāua ma le aogā ia i latou.

A o le afiafi mulimuli o lenei faamoemoe na tofusia ai tagata uma ma molimau e uiga i le tāua o lenei fofo, o nisi na molimau i le suiga tele ua iai le faalogo i mea tiga o le tino, o tina ma tamā matutua e fulafula sooga o ponaivi, ma lē mafai ona faapipio tamailima ae ua iai le suiga tele ina ua faatino lenei fofo. Ae na molimau se tasi o alii talavou i le ma‘i o lona tamā, e uli nisi vaega o ona vae, e fulafula tamailima ma tamaivae ma le tata o lona fatu, ae ina ua ia fofoina na vaaia ai le suiga o lana savali ma ona vae ua leai se uli, ae ua toe tata lelei foi lona fatu, na ia molimau ma le agaga faafetai i lenei polokalame ona ua aogā ia te ia aemaise o lona tamā.

Na maua foi i nisi o saunoaga o lenei fofo o se meaalofa ua tuuina mai e nei tagata Saina mo tagata Samoa, auā ua lē gata ina manuia ai i latou ae ua mafai foi ona faasoa ma fofo ai tagata o aiga, tagata faigaluega ma tagata o ekalesia.

O le sini autu ia fegasoloai lelei alatoto ma faaitiitia le tiga o vaega o le tino, faatasi ai ma lou vaai o le fomai mo lou soifua maloloina. Sa faapea foi ona saunia e fomai ni tusipasi mo i latou sa auai i le faatinoina o lenei fofo ma faaiu ai loa i le iputi ma faamae‘a ai loa lenei polokalame.

Tina ma tama sa maua a latou tusipasi i le faatinoina o le fofo