Faasoa meaalofa a le tina ia Vaitoelau Su‘a Hewson i ona Alo

O fanau o le tofi lea mai le Atua, o le teuga oloa foi lea o le aiga mo le lumanai. O le naunautaiga lea o le tina ia Vaitoelau Su‘a Hewson mo lana fanau ua mafua ai ona ia toe lalaga lana taleni poo le meaalofa a le Atua sa ia galue mai ai le tele o tausaga.

O se tina sa amata mai lana galuega i Samoa i le lolomiina o laei ma le suiina o soo se laei e mananao i ai le atunuu. O ia foi sa faavaeina le fale ofu o le Tie Dye i Samoa ma ia faatuina ai loa lana faleoloa i Matautu ma faatauina ai laei o loo ia suiina.
Ae peitai ua tuua le atunuu ma ua malaga mai foi ma aumau i lenei atunuu sa lē mafai ai loa ona toe faaauauina le pisinisi ona ua iai le suiga o le soifuaga. Ae sa galue lava le tina i nisi o kamupani, auā le tausiaina o le fanau ma le aiga ma faaiu ai loa i le kamupani o le Staxs i New Lynn lea sa avea ai ma pule, ma o iina na toe suia ai se lagona, ua tatau ona toe faaauau ma faaiila le taleni na amata mai ai lona soifua galue.

O le aso 28 o Novema 2014 na toe tupu ai se moemoe fou ma se amataga fou i le aiga ma toe amata ai loa le galuega a le tina ma le fanau i le lolomiina ma le suiina o laei i totonu o le latou fale. Ae peitai ua tupu ma faamanuia le Atua i totonu o le aiga ma le pisinisi na mafua ai loa ona saili se isi nofoaga e faaaogā e le fanau mo le latou galuega.
O le aso 14 o Ianuari i lona Aso Lulu na tatala aloaia ai loa le isi ana nofoaga fou i Richardson Rd i Mt Roskill. O le susuga i le aoao ia Tavai Meni na saunia le tatalo, ma faaulufale loa le mamalu o le atunuu e maimoa i totonu o le fale. O uo ma aiga o le faletua ia Vaitoelau na auai uma atu lava e molimau lenei taumafaiga tāua.

O le tele o laei o le fanau o loo maua ai faapea foi tautaliga Samoa, faatasi ai ma puletasi o tamaitai ma ofutino o alii e oka lava pe a manaomia ae faatali i le 5 aso. Sa vaaia le laufofoga fiafia o uo ma aiga sa auai i le finau ma le vaai mamao o lenei tina i lana fanau. Na taualuga i le iputi lea afiafi ma tala ai loa le filialii i le mamalu o le atunuu.
Ae na faaalia le finagalo o le tina, ua ia faaigoaina lona fale i le, Le Va Rivers, ona e iai taimi e taugalemu ai e iai foi taimi e lē taugalemu ai. O aso ua tafe ai le vai, o aso foi ua lē tafe le vai.
E 7 aso e tatalaina ai le fale, Aso Sa, Aso Gafua, Aso Lua ma le Aso Faraile e tatala ai i le 9am – 6pm a o le Aso Lulu ma le Tofi 9am – 9pm.
Faletua ia Vaitoelau Su’a Hewson ma ona alo