Ua faasafua le iloa ma le malamalama o lenei tamalii o le atunuu i fanau laiti o loo aooga i totonu o aoga tulaga lua. O le manulauti ma le naunautaiga o lenei tamalii ia iloa e fanau le sootaga o le tagata ma le laau faapea ma meaola.
O le Aso Gafua, 8 o Tesema na maua ai e le aoga tulagalua a Mangere East lea avanoa e faasoa atu ai le aogā o le laau. O le tasi lea aoga o loo faatāua ai le gagana Samoa ma o le mafuaaga foi lena ua a‘e ai se finagalo o le faletua ia Malo Sepulona ma faiaoga Samoa o loo galulue i totonu o lenei aoga, e tatau ona faataunuu lea polokalame mo tamaiti i le tatou lava gagana.
Sa molimauina le fiafia o fanauiti e faalogologo i le aoaoga na saunoa i ai le susuga ia Tuilaepa Reupena Kovati. Na ia saunia foi ni fesili i le gagana Samoa e toe suesue ai mafaufau o tamaiti poo latou taofia se mea aogā i lenei aoaoga.
E ‘afa itula na faasoa ai le susuga Tuilaepa i le aogā o le laau, pe faapefea ona ola le laau, pe faapefea foi ona maua e laau mea lelei mo le palapala lea e gaosi ai meaai, e faaliliu e laau le minerale lea ei le palapala faatoa mafai ona ‘ai e tagata le minerale ma le vaitamini.
Sa aoaoina foi i taimaiti mea e manaomia e le laau pe a totō, e manaomia le malamalama o le lā, aua ne‘i tuua i lalo o se mea paolo, e manaomia foi le vai, auā a leai le vai ma le la e lē ola foi le laau.
O se tasi vaega tāua na faasoa i ai lenei fai faatoaga o le faafeusuaiga o fua o laau e manufelelei ma iniseti, lea e maua ai fatu laau lea e maua pe a ‘ai fua o laau ‘aina. O isi mea e faalelei ai le palapala e maua ai meaai a le laau, o lau laau mamago o vaega uma ia na saunoa i ai Tuilaepa i fanau o mea e maua ai meaai a le palapala, o meaai a le laau ma meaai a le tagata.
Na faamalosiau foi lea tamalii i fanau ina ia toaaga e ai fualaau‘aina e pei o apu, moli ma isi, ma ia ta‘i lima e ‘ai i le aso, ae aogā foi pe a sili atu.
O se aoaoga tāua tele mo mātua ma fanau auā e tatau ona malamalama tagata uma i le amataga ma le autu e faatinoina ai se mea aemaise ia iloa le fesootaiga o le tagata ma manu, iniseti faapea foi laau.
E tele aogā ua latou faatāuaina mai lenei avanoa, aemaise lava i aoga tulagalua. Ua silia nei i le 25 tausaga talu ona tautua lea tamalii i totonu o Niu Sila i faatoaga, ua tele foi aiga ma ekalesia ua manuia i lana fesoasoani ma lana tufa e ala i le faamalosia e toto fualaau‘aina e aogā mo le soifua maloloina o le tagata.
