Faasoa e Leataata Pre School le tāua o lana gagana i isi atunuu

E ono aoga amata i le itu i Sisifo o Aukilani sa valaaulia i le polokalame o le faatāuaina o le vaiaso o le gagana Samoa i le aoga amata o le Leataata Pre School i le taeao o le Aso Faraile o le vaiaso ua mavae lea sa faaiuina ai le faatāuaina o le vaiaso o le gagana Samoa. 

O le aoga a Goodwill Kindergarten, Junior Junson Kindergarten, Feather Kindergarten, Jolly Stars Kindergarten, Whizz Kids, ma le aoga faataitai e tasi mai Hobsinville.

O nei aoga uma sa fai ma faamanuiaga i totonu o le aoga Leataata i le taeao o le Aso Faraile a’o gafa fanau a lea aoga ma le tapenaina o le ava o le feiloaiga. 

Ua felanulanuai gagana ma lanu i lea aso aua ua fefiloi faiaoga palalagi, Initia ma Saina aemaise o faiaoga Samoa i le patipatia o le tāua o le gagana Samoa ma lana aganuu. O fanau laiti o le aoga Leaataata lea ua faaaogaina i le paluina o le ava, tufaina o le ava ma isi lava vaega o le agatonu a le atunuu. 

O lagona faateia o le taotele o matua ma faiaoga mai isi aoga sa auai, o le galuega sa faia e nei fanau laiti i le faatāuaina o lana aganuu. O le agaga faafetai foi lea o nei faiaoga uma na faaleoina i le faletua ia Laine Leata Tipi o le pule aoga a Leataata Pre School i lona sao ma lona loto tele i le tuufaatasia o lenei polokalame. 

Aua o le toatele o latou faiaoga palalagi na ona falogo i le tāua o le aganuu Samoa ma lana gagana ae lei mafai ona vaai tino i le faatinoina o le aganuu a Samoa. 

Lea ua latou molimauina i lea aso le tāua o le aganuu a Samoa, ma ua iai foi lo latou fiafia e faatāuaina lea polokalame i totonu o a latou aoga i nisi o tausaga o lumanai aua o loo iai fanau Samoa o loo aooga ai. 

O le faagasoloina o le ava o le feiloaiga na faatinoina lava e fanau laiti ao le pule aoga sa gafa ma le faamatalaina o lea vaega tāua o le aganuu a Samoa i ana malo faaaloalogia sa auai, aua lo latou malamalama i le uiga ma le tāua o le ava i le aganuu. 

Na sosoo ma faafiafiaga a fanau aoga, ma fai le latou taumafataga. 

Ae o le isi vaega sili ona tāua i lea aso, o le mafai ona tautatala ma pepese fanau palalagi mai isi aoga i le gagana Samoa e ala lea ia latou siva Samoa na faaaoga ai pese Samoa. 

Ae na ta’utino nisi o faiaoga mai isi aoga, o latou e faigata tele ona latou tuufaatasia ni polokalame faapenei, aua e fuafua lava e latou i le matutua o tamaiti, ae faafetai i le aoga a Leataata o loo mafai ona faia nei polokalame faapenei.

E tāua tele le vaiaso o le gagana Samoa, aua o loo mafai ona faaauauina ai pea le aoaoina o fanau i le gagana aemaise o le aganuu a Samoa e pei ona ola mai. 

O le tāua foi lea e mafai ona faasoa atu le tāua o lau gagana ma lau aganuu i isi aoga aemaise lava i aoga o loo iai fanau Samoa ae le o mafai ona latou faatāuaina le manulauti o loo faamemelo iai tagata Samoa i soo se atunuu o le lalolagi.

O le tele o tausaga e faatinoina ai lava polokalame a le aoga faataitai a Leataata Pre School ae le misi foi aoga o loo valaauliaina ai. 

Ona o le naunautaiga o le tamaitai pule ma le vasega o faiaoga aemaise o le lagolago o matua, ia mafai ona faasoa ma tufa atu le tāua o lau measina Samoa i isi atunuu o le lalolagi. O lau gagana ma lau aganuu e te mitamita ai.