O se tasi o tamalii iloga i lenei taaloga o le Lakapi i Niu Sila i tausaga ua mavae ia Tuifaasisina Bryan Williams o loo faaalia pea lona lagona lē fiafia i tulafono mai le pulega a le IRB e uiga lava i le agavaa o le toatele o nisi o alii taaalo iloga e agavaa ai mo atunuu e pei o Samoa, Toga, Fiti foi, ona o le tulaga saisaitia lava lea o loo noatia ai pea alii taalo mo isi atunuu pe a ua lē toe moomia e Niu Sila ma ua silia i le 18 masina e lē o toe filifilia ia Niu Sila.
I le talitonuga o Tuifaasisina Bryan Williams, ua tatau i le IRB i le pulega ona toe autiloina le iloiloina o le tulafono o loo aafia ai alii ma tama taaalo mo isi atunuu ina ia toe faamāmā mai ma faafaigofie nai lo o le saisaitia i isi tuutuuga e faia muamua ona faatoa agavaa lea mo ia atunuu, faapei o le agai muamua e taaalo i le taitoafitu a ia atunuu muamua tausaga 2014, ma le 2015 i le taamilosaga taitoafitu faaleva o malo.
O le isi lea vaega o loo matuai ilitata tele i ai Tuifaasisina i lea faiga faapea, o loo lē mautonu nisi o alii taaalo e pei o Rudi Wulf, Lelia Masaga, ma Isaia Toeava ma e foliga mai se‘i vagana ua filifilia ma taaalo i le au taitoafitu a Samoa i le masina fou, ona faatoa agavaa loa lea e taaalo mo Samoa i le Ipu o le lalolagi tausaga fou 2015.
E maumaututu le finagalo o Tuifaasisina Bryan Williams e tatau e le IRB ona toe faafaigofie tulafono o loo aiaia ai alii taaalo, ina ia faatumauina ai pea le agaigai pea i luma o le lelei malosi ma le siitia pea o le tulaga o taaloga lakapi i le malolosi o au, ma atili tosina ai le toatele i le taaloga o le Lakapi.
E tusa ai ma le tulafono o loo taatia mai ai i le taimi nei, ga‘o le fia pua‘i, tele se sootaga o Tuifaasisina Bryan Williams i le Lakapi a Samoa, e ui ina sa ola ma soifua ane i Niu Sila nei ae o loo malosi le toto Samoa e faigata ona ave esea e se isi.
O Tuifaasisina Bryan Williams ua 63 tausaga o lona soifua, o lona tamā o le Samoa ma lona tina o se tina e fai lona pito Samoa. E 75 taaloga na taalo ai mo mle All Blacks, 38 taaloga faalevao-malo mai le tausaga 1970 agai atu i le 1978, tele foi taimi o loo ave ai le fesoasoani a lenei tamalii ia Tuifaasisina Bryan Williams i le atinaeina o le Lakapi a Samoa i soo se vaega.
O ona alo ia Gavin ma Paul sa filifilia ma tofia e avea ma kapeteni o le Au tele a Samoa i tausaga ua mavae atu. Ua lē o na o Samoa le atunuu o loo agai tapenapenaga i le avanoa lea ua matala mai e atinae ai le lakapi i le isi laasaga maualuga i si nei malamalama vaapiapi ua tau vavala mai.
Talosia o le avanoa lelei lea mo nisi nei o alo o le atunuu e pei o Isaia Toeava, Rudi Wulf, Lelia Masaga, Sosene Anesi, Chris Masoe, Casey Laulala mo Samoa, ae o Joe Rokocoko, Sitiveni Siviatu mo Fiti, faapea foi Sam Tuipulotu mo Toga.
Ua sauni atu nei tapenapena a Samoa i le taaloga ma le All Blacks i le tausaga fou. Ua polofesa le taaloga ua tatau foi ona sauni e siitia le lakapi i le tulaga e ave ai le faatāua i le tupe.
