Faasaoina lona ola ina ua musumusu ane, o ia ua ma‘ito

O le alii o Talapelo Soi sa faalauteleina lona olaga faaleaoaoga i se Iunivesite i Fiti, lea na fetaui ai ma se tamaitai mai Tonga ma faia ai se la faigauo. O se mafutaga na vavalalata ma mafanafana na iu ina maua ai le la pepe a o iai pea i Fiti.

Na uma aoaoga a le tamaitai ona foi ane lea i Tonga ma le la pepe ma tausia ai e ona mātua, ae faaauau pea aoaoga a Talapelo seia oo ina mae‘a ma toe foi mai le alii i Samoa, ona malaga mai lea o le tamaitai ma la mafuta ai pea i se mafutaga faapouliuli e lei faaipoipo.

I le faamatalaina e leoleo o le mafutaga lenei, sa nonofo i le aiga o Talapelo i Lalovaea lea na iai se taimi na tulai mai ai ni feeseeseaiga, ma faaoolima ai le alii i le tamaitai Tonga ua la mafutaga o se ulugalii.

Na alualu le mafutaga ma le aiga o Talapelo i Lalovaea ona o ese lea, ae see atu ma nonofo i Solosolo i se isi o aiga o le alii. Na iai pea faaletonu faaleaiga na aafia ai le mafutaga, o lea na ta‘ua e leoleo o se tasi o po na alu ai Talapelo ma inu faatasi ma nisi o ana uo, na foi atu i le fale ua onā, ona ia fasi lea o lona toalua.
Na sola ese le tamaitai ma agai mai loa i le Toomaga mo ē Puapuagatia ma saili ai sona fesoasoani, lea na nofo ai lava ma saili ai loa e le Toomaga se Poloaiga a le faamasinoga e aua ai ne‘i toe alu le tamaitai i le aiga o le alii o Talapelo ae vaaia e le faalapotopotoga.

Na iai se aiga o se tasi o sui o le Toomaga na nofo ai le tamaitai ma faigaluega loa i se fale otiulu i Matautu-tai. O le nofoaga lea na faatino ai le solitulafono e Talapelo e ui ua na silafia aiaiga o le poloaiga a le faamasinog e lē mafai ona ia toe talanoa ma fesootai i le tamaitai.
I le fofogaina o lenei faamasinoga na faaalia ai e leoleo, o se tasi o aso a o faigaluega le tamaitai, na alu ane i fafo o se tulimanu o le fale otiulu e ula ai lana sikaleti, peitai na matuā faateia ai ina ua ia vaaia Talapelo ua alu atu ma se agaese (sapelu).

Na momo‘e televave ane i totonu o le fale otiulu ma tapuni le faitotoa peitai sa malosi le tulei a le alii ma matala ai loa le faitotoa. Na faatino ai loa e Talapelo lona faia o se faaoolima i le tamaitai Tonga ma faaaogā ai le agaese.

E ogaoga ma matuia manu‘a na aafia ai le tamaitai. A o faia lea gaioiga faaalia e leoleo o le sasau atu o le sapelu a lē ua molia na ia lagona ai le musumusu ane i se leo vaivai o le tamaitai ma ia fai ane, o ia ua ma‘ito. Na ia faalogoina loa ia upu, taofi loa le sasau a lana sapelu ae savali ese.

Sa molia Talapelo i le faia o se faaoogamanu‘a tuga ma le taumafai e faaoo le maliu. Sa ia ioeina moliaga uma nei e lua. O le vaiaso ua mavae na lauina ai lona faasalaga lea ua nofosala ai i le falepuipui mo le sefulu tasi tausaga.

O le tamaitai Tonga ua toe foi i lona atunuu ma o loo ia te ia foi le la fanau. Faaalia e le afioga i le faamasino o Vui Clarence Nelson, o se soligatulafono sili lenei ona matuia i mataupu tau sauaga i totonu o aiga poo domestic violence ua sili ona ogaoga ua oo atu i le faamasinoga.
Le afioga i le Faamasino o le Faamasinoga Maualuga Vui Clarence Nelson