E taitasi lava ‘ai na manumalo ai le Roosters i le Cowboys 31-30 i taaloga o le sailia o le fā pito i luga mo le siamupini o le 2014. E uma le tolusefulu minute amata ua lami le Roosters i ai e tolusefulu i le leai.
Na faapea uma tagata e matautia se lami i le taimi e uma ai le taaloga ae peitai na tuli atu lava e le Cowboys tutusa e taitolusefulu toe luasefulu minute o totoe. O le taimi lea na mamulu ai le polo mai lima o Sonny Bill Williams semanu o se avanoa lelei e osofai ai le Cowboys ma manumalo ae peitai na tumau le faaiuga a le laufali ma manumalo ai loa le Roosters i se kolopu mo ‘ai Roosters 31-30 a le Cowboys ma ua see atu le Roosters e taaalo ma Souths i le semifinal o le 2014.
I le taaloga a le Bulldogs ma Manly na mataina le taaalo a alo Samoa e pei o Jesse Sene Lefao, Dunamis Lui ma Steve Matai mo Manly. E le gata i lea na maoae foi le taaalo a Frank Pritchard, Tim Lafai ma Reni Maitua mo le Bulldogs.
E uma le taimi o tutusa ai e ta‘i sefuluono ae o loo faasala Reni Maitua mo minute e sefulu mai se vevesi ina ua sikoa Manly.
O le faaopoopoga o le taimi poo le golden point na toe taliu atu ai Maitua ma momo‘e malosi lea na vave oo ai Lana ‘au i le laina 22 ma kolopu ai loa e le latou fesi ia Trent Hodgkinson le kiki na manumalo ai 17-16.
Ua sauni atu nei le Bulldogs e fetaui ma le Rapiti ae fetaui le Roosters ma Penrith i semifinals o le 2014.
