Faasala leoleo e toafā ua faamaonia na faatamala i le tamaititi 3 tausaga

O le taitai leoleo poo le police inspector le susuga Keti Toleafoa ua faamaonia lona moliaga o le faatamala i le faatinoga o ona tiute faaleoleo ma ua faailoa e le sui Komesina o leoleo le afioga Afamasaga Michael Soonalole, o lona faasalaga o le aveesea o lona tulaga faataitai leoleo ae tuu ifo i se isi tulaga poo se rank ei lalo ifo, peitai e lē o faailoaina poo le ā lea tulaga.

O le faasologa o tulaga faaleoleo poo ranks ua iai nei, e sosoo le tulaga o le satini sinia ma le taitai leoleo. O lona uiga o le tulaga satini ei lalo mai o le satini sinia, ae o le taai lua ei lalo mai o le tulaga satini. E lē o iloa poo fea o tulaga nei o le a suia i ai. O isi leoleo e toatolu e aofia ai le satini, o le taai lua ma se alii leoleo e lē o iloa poo le ā se faasalaga ae ua faamaonia foi o latou moliaga o le faatamala i le faatinoga o o latou tiute. Oi latou uma poo alii leoleo e toafā na tuuaia ona o le loka o se tamā faatasi ma lona atalii 3 tausaga le matua.

O le vaiaso na tea nei na faailoa mai ai e le sui Komesina le faaiuga ua taunuu i ai le faamasinoga faaleoleo na suesueina ai moliaga o le faatamala i le faatinoga o tiute faaleoleo faasaga ia i latou ia e toafā.

O le faamatalaga mai le sui Komesina le afioga Afamasaga Michael o loo faatali i se lipoti e tuuina atu e le afioga Misa Nafoitoa Talaimanu Keti o ia sa avea ma sui komesina i le taimi na tulai mai ai le faaletonu ma tuuaia ai alii leoleo na nafa ma le taulimaina o le mataupu.

Faaalia mai foi e le afioga Afamasaga e mafai ona faamalolo alii leoleo i se faasalaga e tusa ma aiaiga o tulafono faaleoleo ma o latou faasalaga faasino i le moliaga o le faatamala i le faatinoina o tiute tau i le Malu o le Malo, peitai e mafai foi ona faia se isi faasalaga e ese mai i le faamalolo mai le toe avea ma leoleo.

O loo finauina e le tamaitai loia le afioga Leulua‘iali‘i Olinda Woodroffe le totogi e le Malo o se taui tupe i le tamaititi 3 tausaga na loka ma faia se faatoesega a leoleo.

O le taui tupe o loo finauina o loo fuafua e faia ai se teugatupe mo le tamaititi e na te faaaogā pe a oo ina matua ma toe faamatala i ai le mea na tupu ia te ia.
O le mataupu lenei e pei ona silafia, na lagalaga ai manatu ma taofi i le aafia o aiā tatau o le tamaitiiti ona ua loka e aunoa ma se solitulafono aemaise o le matua o ona tausaga ua afaina ai aiaiga o tulafono tau aiā tatau ma le feagaiga ua sainia e Samoa e puipuia ai aiā tatau o fanauiti.
Le saunoaga mai le sui Komesina o leoleo le afioga Afamasaga Michael Soonalole, o le tasi o sui komesina sa avea ma sui komesina talu ai nei le afioga Misa Nafoitoa Talaimanu Keti, ua tuu i ai le faaiuga o alii leoleo e toafā